انگلش کرکٹر معین علی نے ٹیسٹ کرکٹ سے دوبارہ ریٹائرمنٹ لے لی

انگلینڈ کے آل راؤنڈر معین علی نے ٹیسٹ کرکٹ سے دوبارہ ریٹائرمنٹ لے لی۔

معین علی 2021 کے سیزن کے اختتام پر ٹیسٹ کرکٹ سے ریٹائر ہو گئے تھے لیکن پھر رواں سال ایشز سیریز سے کچھ دن قبل انگلش اسپنر جیک لیچ کی انجری کے بعد انگلینڈ کرکٹ ٹیم کی منیجمنٹ کی جانب سے معین علی سے ریٹائرمنٹ واپس لینے کے لیے رابطہ کیا گیا تھا۔

ٹیم منیجمنٹ سے رابطے کے بعد معین علی نے ٹیسٹ کرکٹ سے اپنی ریٹائرمنٹ واپس لیتے ہوئے آسٹریلیا کے خلاف ایشز سیریز میں شرکت کی۔

تاہم گزشتہ روز انگلینڈ نے ایشز سیریز کے آخری ٹیسٹ میچ  میں آسٹریلیا کو 49 رنز سے شکست دے کر سیریز 2-2 سے برابر کر دی۔

اس میچ میں معین علی نے پہلی اننگز میں 34 اور دوسری اننگز میں 29 رنز اسکور کیے جبکہ آسٹریلیا کی دوسری اننگز میں انہوں نے  کھیل کے آخری دن 3 وکٹیں لے کر اپنی ٹیم کو سیریز برابر کرنے میں مدد کی۔

میچ جیتنے کے بعد برطانوی میڈیا کو انٹرویو دیتے ہوئے معین علی نے کہا کہ اب میں ٹیسٹ کرکٹ سے ریٹائر ہو چکا ہوں،اگر  بین اسٹوکس نے ٹیسٹ کرکٹ کھیلنے کیلئے مجھے دوبارہ میسج کیا تو میں اسے ڈیلیٹ کر دوں گا، میں نے واقعی ٹیسٹ کرکٹ سے  بہت لطف اٹھایا ہے اور اسے جیت کے ساتھ ختم کرنا اچھا ہے۔

معین علی نے حالیہ ایشز کے 4 ٹیسٹ میچز میں مجموعی طور پر 180 رنز بنائے اور 9 وکٹیں حاصل کیں۔

انگلش آل راؤنڈر کے ٹیسٹ کرکٹ پر نظر ڈالی جائے تو انہوں نے 68 ٹیسٹ میچز میں  5 سنچریوں کی مدد سے 3094 رنز بنائے اور 204 وکٹیں حاصل کیں۔

واضح رہے کہ انگلینڈ کی ایشز ٹیسٹ کے آخری میچ میں جیت کے ساتھ ہی انگلش فاسٹ بولر اسٹورٹ براڈ بھی کرکٹ سے ریٹائر ہوگئے۔

ا نہوں نے آسٹریلیا کے خلاف اپنے آخری ٹیسٹ کو بھی یاد گار بنادیا۔

ایشز سیریز کے آخری ٹیسٹ میں براڈ نے  اپنے کیریئر کی جب آخری بال فیس کی تو اس پر مچل اسٹارک کو چھکا لگایا جبکہ ٹیسٹ کرکٹ میں انہوں نے اپنی آخری بال کی تو ایلیکس کیری کی وکٹ حاصل کرکے انگلینڈ کو اوول ٹیسٹ جتوایا۔

اسٹورٹ براڈ ٹیسٹ کرکٹ میں 600 یا زائد وکٹیں لینے والے  دنیا کے دوسرے فاسٹ بولر بنے، محض 15 رنز دے کر 8 وکٹیں ان کی بہترین بولنگ ہے۔انہوں نے 167 ٹیسٹ میچز میں 604 وکٹیں لیں۔

میچ کے بعد انگلش ٹیم کی جانب سے دونوں کھلاڑیوں کو خراجِ تحسین بھی پیش کیا گیا۔

واضح رہے کہ سیریز برابر ہونے کے باوجود ایشز ٹرافی آسٹریلیا کے پاس برقرار رہے گی۔

2021 کی ایشز ٹرافی آسٹریلیا نے جیتی تھی اور قوانین کے مطابق سیریز ڈرا ہونے کی صورت میں پچھلا ایڈیشن جیتنے والی ٹیم ٹرافی اپنے پاس رکھتی ہے۔

6 چھکے کھانے سے 600 وکٹیں لینے تک کا سفر طے کرنیوالے براڈ کے شاندار کیریئر پر ایک نظر

ایشز سیریز کے اختتام کے ساتھ ہی اسٹورٹ براڈ کا شاندار ٹیسٹ کیریئر بھی ختم ہوگیا۔انہوں نے 167 ٹیسٹ میچز میں 604 وکٹیں لیں۔

ایشز کے آخری ٹیسٹ میں انگلینڈ نے آسٹریلیا کو شکست دیکر سیریز 2-2 سے برابر کردی

انگلینڈ نے آسٹریلیا کو 49 رنز سے شکست دی، سیریز برابر ہونے کے باوجود ایشز ٹرافی آسٹریلیا کے پاس برقرار رہے گی