08 اگست ، 2023 
نواز شریف نے نگران وزیراعظم کیلئے نام فائنل کرلیا
08 اگست ، 2023
اسلام آ با: نگران وزیر اعظم کی تقرری کا معاملہ آخری مراحل میں داخل ہوگیا ہے۔
ذرائع کے مطابق مسلم لیگ (ن) کے قائد نواز شریف نے نگران وزیراعظم کا نام فائنل کر لیا ہے، نواز شریف نے سابق صدر آصف علی زرداری، مولانا فضل الرحمان اور شہباز شریف سے مشاورت مکمل کرلی ہے۔
ذرائع کا کہنا ہےکہ نگران وزیراعظم کے حوالے سے ابھی صرف سابق صدر آصف زرداری، مولانا فضل الرحمان اور شہباز شریف کو معلوم ہے،آئینی تقاضا پورا کرنے کے لیے شہباز شریف نگران وزیر اعظم کے حتمی فیصلے کے لیے اپوزیشن لیڈر راجہ ریاض سے ملاقات کریں گے۔
وزیر اعظم اور اپوزیشن لیڈر باہمی مشاورت کے بعد نگران وزیراعظم کا اعلان کریں گے۔
نگران وزیراعظم کے نام کا فیصلہ آج رات 10 بجے تک ہو جائے گا: رانا ثنااللہ
دوسری جانب وزیرداخلہ رانا ثنا اللہ نے جیو نیوز کے پروگرام آج شاہ زیب خانزادہ کے ساتھ میں بات چیت کرتے ہوئے کہا کہ ایم کیو ایم نے کامران ٹیسوری کا نام دیا ہے، پیپلز پارٹی بھی ایک دو نام دے گی، مولانا فضل الرحمان نے کہہ دیا ہے کہ وزیراعظم جو فیصلہ کریں گے انہیں منظور ہوگا۔
وزیر داخلہ کا کہنا تھا کہ نگران وزیراعظم کے حوالے سے فیصلہ آج رات 10 بجے تک ہوجائے گا۔
