09 اگست ، 2023 
شائقین کرکٹ کو ورلڈکپ کی ٹکٹیں کب ملیں گی؟ آئی سی سی نے تاریخ کا اعلان کردیا
09 اگست ، 2023
رواں برس بھارت میں ہونیوالے کرکٹ ورلڈ کپ کی ٹکٹوں کیلئے شائقین کا انتظار ختم ہوگیا، انٹرنیشنل کرکٹ کونسل (آئی سی سی) نے آخرکار ٹکٹوں کی فروخت کیلئے تاریخوں کا اعلان کردیا۔
آئی سی سی نے ایونٹ ری شیڈول کرنے کے بعد اعلان کیا کہ 5 اکتوبر سے ہونیوالے ورلڈ کپ کی ٹکٹیں ایونٹ کے آغاز سے صرف 40 روز قبل 25 اگست سے فروخت کیلئے دستیاب ہوں گی۔
آئی سی سی کے مطابق ورلڈ کپ میچز کی ٹکٹیں مرحلہ وار فروخت کی جائیں گی، 25 اگست سے پہلے مرحلے میں ان میچز کی ٹکٹیں فروخت کیلئے دستیاب ہوں گی جن میں بھارت کی ٹیم شریک نہیں ہے۔
بھارت کے میچز کی ٹکٹیں شہروں کے حساب سے 30 اگست سے 3 ستمبر تک فروخت کیلئے پیش ہوں گی۔
پاکستان اور بھارت کے درمیان احمد آباد میں 14 اکتوبر کو شیڈولڈ میچ کی ٹکٹیں 3 ستمبر سے فروخت ہوں گی تاہم 15 اگست سے شائقین ٹکٹوں کی خریداری کیلئے ویب سائٹ پر اپنی دلچسپی ظاہر کر پائیں گے۔
کرکٹ شائقین کا کہنا ہے کہ ٹکٹیں اگر ورلڈ کپ سے صرف 40 روز قبل ہی فروخت کیلئے دستیاب ہوں گی تو وقت کی تنگی کی وجہ سے ایونٹ کیلئے بھارت سفر کرنے کے خواہشمند شائقین کیلئے سفری انتظامات کرنا ایک چیلنج سے کم نہیں ہوگا۔
یاد رہے کہ ماضی میں ہونیوالے آئی سی سی ایونٹس میں ٹکٹوں کی فروخت کئی مہینوں پہلے شروع کی جاتی رہی ہے۔
مزید خبریں :
پرتھ ٹیسٹ میں سنچری:کوہلی نے سر ڈون بریڈمین کو پیچھے چھوڑ دیا
25 نومبر ، 2024
رشبھ پنت آئی پی ایل کی تاریخ کے مہنگے ترین کھلاڑی بن گئے
25 نومبر ، 2024
