19 اگست ، 2023 
10 سالہ سارہ کا قتل، برطانوی پولیس نے والد کی کھوج کیلئے پاکستان سے رابطہ کرلیا
19 اگست ، 2023
برطانیہ کی کاؤنٹی سرے میں 10سالہ بچی سارہ کی لاش ملنے کی تحقیقات میں پیشرفت ہوئی ہے۔
برطانوی فیڈرل انویسٹی گیشن سروس نے پاکستان پولیس سےرابطہ کیا ہے۔ پاکستان پولیس کے مطابق ہمیں عرفان شریف کا کھوج لگانے کا کہا گیا ہے گرفتار کرنے کا نہیں۔
بچی کی لاش 10 اگست کو سرے کے علاقے ووکنگ میں گھر سے ملی تھی اور پولیس نے بچی کے والد عرفان شریف، اس کی بیوی اور بھائی فیصل کو نامزدکیا ہے۔
سرے پولیس کے مطابق لاش ملنے سے ایک دن قبل تینوں نامزد افراد پاکستان فرار ہوئے اور عرفان نے اسلام آباد پہنچ کربچی کی اطلاع ایمرجنسی نمبرپر دی۔
پولیس کا کہنا تھاکہ پولیس کو گھر سے بچی کی لاش ملی، جسم پر پرانے زخم کے نشانات تھے، پوسٹ مارٹم میں موت کی وجہ معلوم نہیں ہوسکی۔
برطانوی پولیس حکام کے مطابق طویل عرصے کے زخموں کی وجہ سے تحقیقات کی نوعیت تبدیل ہوئی اور تحقیقات کا دائرہ وسیع کیا جا رہا ہے۔
برطانوی پولیس حکام نے بتایاکہ کرائم پراسیکیوشن سروس، انٹرپول، نیشنل کرائم ایجنسی اور فارن آفس سے مل کرتحقیقات کررہےہیں، معاملے پر پاکستانی حکام سے بھی رابطہ کیا جارہاہے۔
برطانوی میڈیا کا کہنا ہے کہ پاکستان اور برطانیہ کے درمیان ملزمان کی حوالگی کا معاہدہ نہیں۔
