چندریان 3 کے روور کی چاند کی سطح پر اترنے کی پہلی ویڈیو جاری

بھارتی خلائی مشن چندریان 3  کی چاند کے قطب جنوب پر روور کے لینڈر سے نیچے اترنے کی پہلی ویڈیو جاری کردی گئی۔

مائیکروبلاگنگ ویب سائٹ ایکس پر بھارتی خلائی ایجنسی انڈین اسپیس ریسرچ آرگنائزیشن (اسرو) نے یہ ویڈیو جاری کی جس میں روور کو لینڈر سے چاند پر اترتے دیکھا جاسکتا ہے۔

اسرو کی جانب سے شیئر کردہ مختصر دورانیے کی ویڈیو میں دیکھا جاسکتا ہے کہ لینڈر سے روور چاند کی سطح پر اترتا ہے اور اپنے سفر کا آغاز کرتا ہے۔

اس سے قبل چندریان 3 کی پہلی بار چاند پر لینڈنگ کے بعد چاند کی سطح کی پہلی تصاویر بھی جاری کی گئی تھیں۔

چندریان 3 کا بجٹ کتنا ہے؟

بھارتی میڈیا کے مطابق چاند کے اس تاریکی حصے تک پہنچانے والے بھارتی مشن چندریان 3 کا بجٹ (615 کروڑ بھارتی روپے) یعنی( 75 ملین امریکی ڈالر ) ہے جو کہ کئی ہالی وڈ فلموں سے بھی کم ہے۔

چاندکے قطب جنوب کی اہمیت کیوں؟

سائنسدانوں کا خیال ہےکہ چاندکے قطب جنوب میں کافی مقدار میں برف موجود ہے، چاند پر برف یعنی پانی کی موجودگی کا مطلب یہ ہے کہ مستقبل میں انسان اسے استعمال کر سکتا ہے، یہ برف نہ صرف پینےکے پانی میں تبدیل کی جاسکتی ہے بلکہ اس سے آکسیجن اور ہائیڈروجن حاصل کی جاسکتی ہے جس سے وہاں زندہ رہنے اور راکٹ یا خلائی جہاز کے لیے فیول حاصل کرنا ممکن ہوسکتا ہے۔

بھارتی میڈیارپورٹ میں عالمی باکس آفس پر راج کرنے والی دو ہالی وڈ فلموں کا حوالہ دیتے ہوئے بتایا گیا کہ چندریان 3 کا بجٹ گریٹا گروگ کی فلم’ باربی‘ جس کا بجٹ 145 ملین ڈالر ہے، کرسٹوفر نولانس کی فلم ’اوپن ہائمر‘ جس کا بجٹ 100 ملین ڈالر ہے اس سے بھی کم ہے۔

یہی نہیں چندریان 3 کا مشن 2013 میں کرسٹوفر نولانس کی اسپیس مووی ’انٹراسٹیلر ‘ سے بھی کم ہے جس کا بجٹ 165 ملین ڈالر ہے ۔

رپورٹ میں مزید بتایا گیا ہے کہ چندریان 3 کا بجٹ روس کے حال ہی میں ناکام ہونے والے 200 ملین ڈالر کے لونا 25 مشن سے بھی کم ہے۔

رپورٹ کے مطابق یہ بجٹ چین کے پہلے کامیاب ہونے والے مشن کے 219 ملین ڈالر کے بجٹ سے بھی کم ہے۔