29 اگست ، 2023 
اے این ایف نے ڈرون کے ذریعے منشیات اسمگلنگ کی کوشش ناکام بنادی
29 اگست ، 2023
لاہور: اینٹی نارکوٹکس فورس نے ڈرون کے ذریعے منشیات اسمگلنگ کے خلاف ایک اور بڑی کارروائی کرتے ہوئے ملزمان کے قبضے سے 10 کلو ہیروئن اور ڈرون برآمد کرلیا۔
اینٹی نارکوٹکس فورس نے لاہور میں کارروائی کرتے ہوئے ڈرون کے ذریعے منشیات اسمگل کرنیوالے گروہ کا ایک کارندہ گرفتار کرلیا جس کی شناخت فیاض حسین کے نام سے ہوئی، ملزم لاہور کا رہائشی ہے۔
اے این ایف ترجمان نے بتایا کہ انٹیلی جنس اطلاع پر ڈی ایچ اے لاہور کے قریب ایک کار کو رکنے کا اشارہ کیا گیا، کار سوار ملزم نے گاڑی روکنے کی بجائے موقع سے بھگا دی جس پر گاڑی کا تعاقب کیا گیا اور ملزم نے گاڑی فٹ پاتھ سے ٹکرا دی جس کے بعد ملزم کو موقع پر گرفتار کر لیا، گاڑی کی تلاشی لینے پر گاڑی سے 10 کلوگرام ہیروئن اور ڈرون برآمد کیا جب کہ ایک کلوگرام ہیروئن کا ایک پیکٹ ہوائی ڈرون کے ساتھ منسلک تھا۔
ترجمان کےمطابق گرفتار ملزم اے این ایف کو دیگر مقدمات میں بھی مطلوب تھا، دوران تفتیش ملزم نے ڈرون کے ذریعے منشیات اسمگلنگ کا اعتراف کیا، ملزم سے گروہ کے دیگر ارکان کی گرفتاری کیلئے تحقیقات کی جارہی ہیں۔
