بابر نے 151 رنز سے ویرات کو بتایا کہ سوچ کر سامنا کرنا: بھارتی صحافی وکرانت گپتا

ایشیا کپ میں نیپال کے خلاف کھیلے گئے افتتاحی میچ میں بابر اعظم کی 151 رنز کی شاندار اننگز  پر جہاں  شائقین کرکٹ  بابر کی تعریف کرتے نظر آرہے ہیں وہیں بھارت کے اسپورٹس تجزیہ کار بھی پاکستانی کپتان کی شاندار اننگز  سمیت ٹیم کی پرفارمنس کو سراہے بغیر نہ رہ سکے۔

بھارت کے ڈیجیٹل شو’ اسپورٹس تک ‘ کے دوران بھارتی صحافی وکرانت گپتا نے شو میں شریک دیگر میزبانوں سے بابر اعظم کی شاندار اننگز کا سوال کیا اور کہا کہ بابر کا ون ڈے کرکٹ کیرئیر دیکھا جائے تو انہیں پاکستان کیلئے رنز بنانے کی مشین کہا جاسکتا ہے، یہ بھول جائیں کہ  بابر کے سامنے کون سی ٹیم  تھی، یہ دیکھیں کہ بابر کے آخری 100 رنز 57 گیندوں پر ہیں جس پر بلا جھھجک یہ کہا جاسکتا ہے کہ بابر کو رنز بنانے کا طریقہ آتا ہے۔

ایشیا کپ: بابر کی نیپال کیخلاف شاندار اننگز ، بھارتی کرکٹرز بھی تعریف کرنے پر مجبور

بابر اعظم نے نیپال کے خلاف ون ڈے کیریئر کی 19 ویں سنچری اسکور کی اور 151 رنز کی شاندار اننگز کھیلی

بھارتی صحافی نے کہا کہ کسی بھی ٹورنامنٹ میں ٹیم کا پہلا میچ خدشات بھرا ہوتا ہے لیکن بابر نے اپنے پہلے میچ میں 100 سے زائد رنز کرڈالے، نیپال کے خلاف   میچ کے ذریعے جو پاکستان ٹیم اور بابر چاہتے تھے وہ ان کو مل گیا ہے۔

وکرانت گپتا نے  کپتان کے قصیدے پڑھتے ہوئے کہا ایشیا کپ کو جیسی اوپننگ چاہیے تھی وہ مل گئی ہے، میچ کی شروعات میں گراؤنڈ میں بھی گرمی کی وجہ سے رش نہیں تھا لیکن بابر کی پرفارمنس کے ساتھ ہی اسٹیڈیم بھر گیا، 70 سے 80  فیصد افراد بابر کی پرفارمنس سے پہنچ گئے، ایشیا کپ اور ان کی ٹیم کو جس تڑکے کی ضرورت تھی بابر نے اپنی پرفارمنس سے وہ لگادیا ہے، پاکستان نے اپنی پرفارمنس سے اور بابر نے اپنے 151 رنز سے بھارتی بلے بازوں چاہے وہ ویرات ہو یا پھر روہت ہو، ان کو سمجھادیا کہ یہ دیکھ کر سامنے آنا۔

بھارتی صحافی نے مزید کہا کہ ساتھ ہی پاکستان نے اس جیت سے پہلا ٹیمپو سیٹ کردیا ہے جب کہ بھارتی ٹیم ابھی بھی کشمکش کا شکار ہے، دوسری جانب پاکستان ٹیم کا بیٹنگ اور بولنگ آرڈر دونوں سیٹ ہے۔