چینی کی قیمتوں میں اضافے پرکارروائی کا فیصلہ، شوگرملوں کے گیٹ پر ایف بی آر ٹیمیں تعینات

حکومت  نے چینی کی قیمتوں میں اضافے پرکارروائی کا فیصلہ کرلیا۔

ذرائع وزارت فوڈ سکیورٹی کے مطابق تمام شوگر ملوں کے گیٹ پر ایف بی آرنے ٹیمیں تعینات کردیں ہیں اور وزارت خزانہ نے اسمگلروں کے خلاف کارروائیاں بھی شروع کردی ہیں۔

ذرائع کا کہنا ہے کہ افغانستان اور ایران کی سرحدوں پر بھی چیکنگ بڑھادی گئی ہے اور سرحدوں پر اسمگلروں کی نقل وحرکت روکنے کیلئے خفیہ اداروں کی مدد لی جارہی ہے۔

وزارت فوڈسکیورٹی نے ہدایت کی ہے کہ صوبے چینی کی ذخیرہ اندوزی روکنے کیلئے خصوصی ٹاسک فورس بنائیں اور ناجائز منافع خوروں کےخلاف بھی کارروائیاں تیز کریں۔

لاہور ہائیکورٹ کا حکم امتناع چینی کی قیمتوں میں اضافے کا سبب بنا، پنجاب حکومت کی رپورٹ

شوگر ملز کے تمام کیس مخصوص عدالت میں چلائے جاتے ہیں، کسی نہ کسی بہانے اسٹے آرڈر کی تاریخوں میں توسیع کی جارہی ہے، حکم امتناع کوختم کرنے کی ضرورت ہے ورنہ ملک اورصوبہ مزید بحران کا شکارہوگا: نگران حکومت پنجاب کی رپورٹ

دوسری جانب ایف بی آر نے اشیا کی غیرقانونی نقل وحمل اوراسمگلنگ روکنے کیلئے آزادکشمیرکوپاکستان سے ملانے والی 2شاہراہوں پر چوکیاں قائم کرلی ہیں۔

ایف بی آر نے کوہالہ پل اورمنگلہ پل پرچیک پوسٹیں قائم کیں اور چیک پوسٹوں کے قیام سے متعلق نوٹیفکیشن بھی جاری کردیاگیا۔

ایف بی آر کے مطابق کوہالہ پل پر قائم چیک پوسٹ کو 2 موبائل ٹیموں کی سہولت ہوگی، کوہالہ پل چیک پوسٹ کادائرہ اختیار مری ایکسپریس وے، جی ٹی روڈ اوربھوربن روڈ سے بارہ کہو تک ہے۔

ایف بی آر نے بتایاکہ میرپورکوپنجاب سے ملانے والی منگلہ روڈ پر ناکودارچیک پوسٹ قائم کی گئی جس کا دائرہ اختیار منگلا روڈ، دینہ بائی پاس، جی ٹی روڈجہلم اورکلرسیداں کی طرف دھان گلی تک ہوگا، ناکودارچیک پوسٹ کو ایک موبائل ٹیم کی بھی خدمات حاصل ہونگی۔