واٹس ایپ کے تمام صارفین اب ایچ ڈی فوٹوز اور ویڈیوز بھیج سکتے ہیں

07 ستمبر ، 2023

اگست میں مارک زکربرگ نے اعلان کیا تھا کہ واٹس ایپ میں ایچ ڈی فوٹوز شیئر کرنے کا فیچر متعارف کرایا جا رہا ہے جبکہ ایچ ڈی ویڈیوز کا فیچر بھی جلد میسجنگ ایپ کا حصہ بنے گا۔

اب کمپنی نے اعلان کیا ہے کہ ایچ ڈی فوٹوز اور ایچ ڈی ویڈیوز کا فیچر تمام صارفین کو دستیاب ہے۔

واٹس ایپ کے ترجمان کی جانب سے جاری بیان میں بتایا گیا کہ ایچ ڈی فوٹوز اور ویڈیوز کا فیچر دنیا بھر میں صارفین استعمال کر سکتے ہیں۔

کمپنی کی جانب سے کہا گیا کہ نئے فیچر کے ذریعے صارفین اپنے اہم لمحات کو شیئر کر سکتے ہیں۔

یہ بھی پڑھیں

اس نئے فیچر کے ذریعے صارفین واٹس ایپ پر 720p ریزولوشن والی ویڈیوز اپنے دوستوں سے شیئر کر سکیں گے۔

اس سے پہلے 480p ویڈیوز کو ہی بھیجنا ممکن تھا۔

اس فیچر کو کیسے استعمال کریں؟

اس فیچر کو استعمال کرنے کے لیے اس فوٹو یا ویڈیو کو سلیکٹ کریں جس کو شیئر کرنا چاہتے ہیں اور اسکرین پر اوپر ایڈیٹنگ ٹولز میں ایچ ڈی کے آپشن پر کلک کریں۔

جب آپ اس ایچ ڈی بٹن پر کلک کریں گے تو ایک نئی پوپ اپ ونڈو نمودار ہوگی جہاں آپ فوٹو یا ویڈیو کوالٹی سلیکٹ کر سکیں گے۔

واٹس ایپ میں بائی ڈیفالٹ اسٹینڈرڈ کوالٹی کو سلیکٹ کیا گیا ہے مگر اس کے نیچے ایچ ڈی کوالٹی کا آپشن بھی ہوگا۔

جب کوئی صارف ایچ ڈی کوالٹی کو سلیکٹ کرکے فوٹو یا ویڈیو بھیجے گا تو اس میں ایچ ڈی لیبل بھی بائیں کونے میں نیچے نظر آئے گا۔