پاک بھارت ٹاکرا: کولمبو میں سورج نکل آیا لیکن بارش کا امکان اب بھی موجود

ایشیا کپ ون ڈے سپر فور مرحلے میں پاک بھارت ٹاکرے کیلئے ایک طرف کرکٹ پنڈتوں کی آراء سامنے آرہی ہیں تو دوسری طرف تیز ہواؤں اور گرج چمک کے ساتھ بارش کی پیشگوئی نے شائقین کرکٹ کو  پریشان کر رکھا ہے۔

پاکستان ایشیا کپ کے سپر فور مرحلے کا دوسرا میچ آج کولمبو میں بھارت کے خلاف کھیلےگا تاہم دنیائے کرکٹ کے اہم ترین ٹاکرے سے قبل آسمان پر گہرے بادل منڈلانے لگے  جس سے شائقین کرکٹ تو تشویش لاحق ہو گئی ہے  تاہم  اب کولمبو میں سورج نکل  آیا ہے ۔

 موسمیاتی ویب سائٹ کے مطابق کولمبو میں آج دن کے اوقات میں 80 فیصد تیز ہواؤں اور گرج چمک کے ساتھ بارش کی پیشگوئی کی گئی ہے جبکہ آنے والے پورے ہفتے میں کولمبو میں بارش کا امکان ہے۔

یہ بات بھی قابل غور  ہے کہ بارش کے باعث میچ متاثر ہونے کی صورت میں میچ پیر کو کھیلا جائے گا، ایشین کرکٹ کونسل (اے سی سی ) نے پاکستان کرکٹ بورڈ ( پی سی بی) کے اعتراضات پر پیر کو بطور  ریزرو ڈے رکھنے کا اعلان کیا تھا۔

اگرآج بارش کی وجہ سے پاک بھارت میچ مکمل نہیں ہوتا تو میچ 11ستمبرکو بھی جاری رہےگا اور وہیں سے شروع ہوگا جہاں پر روکا گیا ہوگا۔

ایشیاکپ: پاکستان نے بھارت کیخلاف میچ کیلئے پلیئنگ الیون کا اعلان کردیا

پاکستان کی ٹیم میں تین فاسٹ بولرز، ایک فاسٹ بولنگ آل راؤنڈر اور تین اسپن آل راؤنڈر شامل ہیں

 پاکستان اور بھارت کے درمیان مقابلے میں کون کس ٹیم پر بھاری رہے گا جیو نیوز نے اس حوالے سے پاک بھارت کرکٹ پنڈتوں کی رائے  بھی جاننے کی کوشش کی ہے۔

پاک بھارت کرکٹ پنڈتوں کی جیو نیوز سےگفتگو

سابق بھارتی کپتان اظہرالدین نے کہاکہ اس وقت پاکستان ٹیم فارم میں ہے لیکن کوہلی سے امیدیں ہیں،سابق کرکٹر معین خان کا کہنا ہے کہ ایشیا کپ میں بھارت کو پاکستان آنا چاہیے تھا، سابق کرکٹر عبدالرزاق نے کہا ایشیا کپ میں بھارت کی باڈی لینگویج کمزور نظر آئی ہے۔

بھارت کے سابق کرکٹر کپل دیو نے کہا کہ بہت ساری چیزیں ہونی چاہیے تھی جو نہیں ہورہی ہیں۔