ایشیاکپ: ’پاکستان نے سری لنکا کو اچھے مارجن سے نہ ہرایا تو باہر ہوجائیگا‘

سابق ٹیسٹ کرکٹر معین خان نے ایشیا گروپ کے سپر فور مرحلے میں قومی ٹیم کی بھارت کے ہاتھوں بدترین شکست پر کہا ہےکہ پاکستان کو سری لنکا کو لازمی طور پر اچھے مارجن سے میچ ہرانا ہوگا ورنہ باہر ہوجائے گا۔

جیوکے پروگرام ’بیٹل گراؤنڈ‘ میں میزبان دانش انیس سے گفتگو کرتے ہوئے سابق وکٹ کیپر اور بیٹسمین معین خان نے کہا کہ پاکستان کرکٹ ٹیم کو اپنی خامیوں کا جائزہ لینا ہوگا، پاکستان کو پہلے بیٹنگ کرنی چاہیے تھی، بابراعظم نے ٹاس جیتنے کے باوجود پہلے بولنگ کرکے غلطی کی۔

انہوں نے کہا کہ بھارت کے آرڈنری بولرز بھی پاکستان کیلئے خطرناک ہوگئے تھے، پاکستان ٹیم لگتا ہے یہ سوچ کر میدان میں اتری تھی کہ بارش ہوجائے گی اور دونوں ٹیموں کو ایک ایک پوائنٹ مل جائے گا، پاکستان ٹیم کو پریشان نہیں ہونا چاہیے ابھی میچ باقی ہیں، پاکستان کو سری لنکا کو لازمی طور پر اچھے مارجن سے میچ ہرانا ہوگا ورنہ باہر ہوجائے گا۔

معین خان کا کہنا تھا کہ امام الحق یا فخر زمان کی جگہ عبداللہ شفیق کو اوپنر کھلایا جاسکتا ہے۔

پروگرام میں گفتگو کرتے ہوئے سابق ٹیسٹ کرکٹر سکندر بخت نے کہا کہ پاکستان کرکٹ ٹیم کو تین چار کھلاڑیوں پر مشتمل گروپ کنٹرول کرتا ہے جب کہ پی سی بی کے لوگوں کو اپنے عہدے بچانے کیلئے عدالتوں کے چکر لگانے سے فرصت نہیں ہے۔

انہوں نے کہا کہ بابراعظم کی کپتانی، اسپن بولنگ اور مڈل آرڈر پر کافی عرصے سے بات کررہا ہوں، انڈیا نے پاکستان کو بیٹنگ، بولنگ اور فیلڈنگ، ہر شعبے میں آؤٹ کلاس کردیا، انڈیا کی فاسٹ اور اسپن بولنگ ہماری بولنگ سے بہت زیادہ بہترتھی، ایسا لگتا ہے پاکستان کے نئے فاسٹ بولرز اپنی کارکردگی پر زیادہ پراعتماد ہوگئے تھے، ایسا لگ رہا تھا بابراعظم یہ سمجھ کر گراؤنڈ میں آئے تھے کہ بارش ہوجائے گی اور میچ ختم ہوجائے گا۔