17 ستمبر ، 2023 
بابر اور شاہین کے درمیان لفظی تکرار کی خبریں جھوٹ ہیں، سینئر کھلاڑی نے سب بتادیا
17 ستمبر ، 2023
پاکستان کرکٹ ٹیم کے ایک سینئر کھلاڑی نے ٹیم کے ڈریسنگ روم میں جھگڑے کی افواہوں کو مسترد کر دیا۔
ایشیا کپ میں سری لنکا سے سیمی فائنل کا درجہ اختیار کر لینے والے میچ میں شکست کے بعد میڈیا میں خبریں زیر گردش تھیں کہ پاکستان کے کپتان بابر اعظم اور فاسٹ بولر شاہین شاہ آفریدی کے درمیان ڈریسنگ روم میں زبردست زبانی تکرار ہوئی۔
ان رپورٹس میں دعویٰ کیا جارہا تھا کہ بابر اعظم نے کچھ سینئر کھلاڑیوں کی کارکردگی پر عدم اطمینان کا اظہار کیا، شاہین شاہ آفریدی نے بابر کی حوصلہ افزائی کی کہ وہ ان کھلاڑیوں کی کارکردگی کا اعتراف کریں جنہوں نے اچھی کارکردگی کا مظاہرہ کیا تھا۔
مبینہ طور پر اس بات پر محمد رضوان نے صورتحال کو سنبھالنے کی کوشش کی۔
نجی ویب سائٹ کرکٹ پاکستان کے مطابق جب اس حوالے سے پاکستان کرکٹ ٹیم کے ایک سینئر کھلاڑی سے پوچھا گیا تو انہوں نے ان افواہوں کی تردید کر تے ہوئے کہا 'ٹیم کی واحد توجہ کرکٹ پر ہے اور ہمیں ناقدین کی فکر نہیں ہے'۔
قومی کھلاڑی کا کہنا تھا کہ 'میچ ہارنے سے ہمارے ناقدین کو اپنی رائے دینے کا موقع ملتا ہے لیکن یہ محض منفی قیاس آرائیاں ہیں'۔
انہوں نے وضاحت کرتے ہوئے کہا 'ٹیم میٹنگ میں سب نے اپنے خیالات کا اظہار کیا لیکن زبانی جھگڑے یا کوچنگ اسٹاف کی مداخلت کی افواہوں میں کوئی صداقت نہیں ہے، سب ایک ساتھ ہی میٹنگ سے اٹھے اور بہت سے ساتھی پاکستان واپس چلے گئے'۔
مزید خبریں :
اظہر علی کو پی سی بی میں اہم عہدہ مل گیا
22 نومبر ، 2024
