ایپل کا نیا آپریٹنگ سسٹم 18 ستمبر کو آئی فون صارفین کو دستیاب ہوگا

17 ستمبر ، 2023

اس نئے آپریٹنگ سسٹم کی پہلی جھلک جون میں پیش کی گئی تھی / فوٹو بشکریہ ایپل

ہر سال ایپل کی جانب سے آئی فون کے آپریٹنگ سسٹم (آئی او ایس) کو اپ گریڈ کیا جاتا ہے جس میں متعدد نئے فیچرز کا اضافہ کیا جاتا ہے۔

اس سال آئی او ایس 17 آئی فون صارفین کے لیے 18 ستمبر کو متعارف کرایا جا رہا ہے جس کی پہلی جھلک جون میں کمپنی کی سالانہ ڈویلپر کانفرنس کے موقع پر پیش کی گئی تھی۔

ایپل کا نیا آپریٹنگ سسٹم صرف آئی فون ایکس ایس یا اس کے بعد کے ماڈلز کے لیے دستیاب ہوگا اور 2017 یا اس سے پہلے کے فونز میں اسے اپ ڈیٹ نہیں کیا جاسکے گا۔

یعنی اگر آپ آئی فون 8 اور آئی فون ایکس (یا 10) استعمال کررہے ہیں تو اب آپ کے لیے ایپل کی سافٹ وئیر اپ ڈیٹس دستیاب نہیں ہوں گی۔

یہ غیرمتوقع فیصلہ نہیں کیونکہ ایپل کی جانب سے پرانی ڈیوائسز کے لیے سافٹ وئیر سپورٹ کو ہر سال ختم کیا جاتا ہے۔

آئی فون ایکس ایس، ایکس ایس میکس، ایکس آر، آئی فون 11، 11 پرو، 11 پرو میکس، آئی فون 12، 13 اور 14 سیریز کے فونز میں اس نئے آپریٹنگ سسٹم کو اپ ڈیٹ کرنا ممکن ہوگا۔

آئی فون 15 سیریز کے فونز جب صارفین کو دستیاب ہوں گے، تو ان میں بائی ڈیفالٹ نیا آئی او ایس سسٹم موجود ہوگا۔

مگر یہ واضح رہے کہ نئے آئی او ایس سسٹم تک رسائی ختم ہونے کے بعد بھی آپ کا پرانا آئی فون آئی او ایس 16 یا اس سے پہلے کے آپریٹنگ سسٹمز پر کام کرتا رہے گا، بس وہ نئے فیچرز سے محروم رہے گا۔

اس نئے آپریٹنگ سسٹم میں متعدد نئے فیچرز کا اضافہ کیا جا رہا ہے مگر اسٹینڈ بائی موڈ نامی فیچر سب سے زیادہ خاص ہے۔

یہ فیچر آئی فون کی لاک اسکرین کو اسمارٹ ہوم ڈیوائس کی طرح کے ڈسپلے میں تبدیل کر دے گا۔

اس فیچر سے فون لاک ہونے پر بھی ڈسپلے پر موسم، کیلنڈر اپائنٹمنٹس اور نوٹیفکیشنز سمیت دیگر کو دیکھنا ممکن ہوگا۔

یہ نئی ٹیکنالوجی اس وقت مددگار ثابت ہوگی جب آپ کا آئی فون کسی میز کے اوپر رکھا ہو اور آپ اسے ان لاک کیے بغیر نوٹیفکیشنز یا دیگر تفصیلات جاننے کے خواہشمند ہوں۔