29 ستمبر ، 2023 
ہنگو کی مسجد میں خودکش دھماکا، عینی شاہد نے کیا دیکھا؟
29 ستمبر ، 2023
ہنگو کی مسجد میں ہونے والے خود کش دھماکے کے حوالے سے عینی شاہدین نے آنکھوں دیکھا احوال بتایا ہے۔
پولیس کے مطابق ہنگو میں مسجد کے اندر خودکش دھماکا ہوا، 2 شدت پسندوں نے تھانہ دو آبہ میں اندر گھسنے کی کوشش کی، تھانے کے گیٹ پر دہشتگردوں نے فائرنگ شروع کی۔
پولیس حکام کا بتانا ہے کہ پولیس کی جوابی فائرنگ سے ایک خودکش بمبار تھانے کے گیٹ میں ہلاک ہوا، شدت پسندوں کی فائرنگ سے 2 پولیس اہلکار زخمی بھی ہوئے جبکہ دوسرے دہشت گرد نے تھانے کے اندرداخل ہوکر مسجد میں خود کو اڑا دیا۔
پولیس حکام کے مطابق اہلکاروں کے بروقت رسپانس سے دھماکے سے زیادہ جانی نقصان نہیں ہوا۔
دوسری جانب ایک عینی شاہد کا بتانا ہے کہ دھماکے کے وقت مسجد کے اندر 60 سے 70 لوگ موجود تھے، خودکش حملہ آور نےگیٹ سے اندر آنےکی کوشش کی تاہم پولیس اہلکار کی فائرنگ اور مقابلے کے باعث اکثر لوگ مسجد سے باہر نکل گئے جس کے باعث دھماکے میں زیادہ جانی نقصان نہ ہوا۔
ڈپٹی کمشنر کوہاٹ عظمت اللہ وزیر کا کہنا ہے ہنگو میں دھماکے کے پیش نظر ضلع کوہاٹ کے تمام اسپتالوں میں ایمرجنسی نافذ کر دی گئی ہے۔
خیال رہے کہ ہنگو کے تھانہ دوآبہ اور مسجد میں ہونے والے خود کش دھماکوں میں 3 افراد جاں بحق اور 12 زخمی ہوئے۔
مزید خبریں :
پنجاب اسمبلی نے ترمیمی زرعی انکم ٹیکس بل منظور کرلیا
6 گھنٹے پہلے
کیا پیراتھائرائیڈکا علاج پاکستان میں ممکن ہے؟
9 گھنٹے پہلے
