بابر کو ورلڈکپ میں شیروں جیسا نظر آنا چاہیے، شاہد آفریدی کا مشورہ

 

قومی ٹیم کے سابق کپتان  شاہد آفریدی نے کپتان بابر اعظم کو   بھارت میں  شیروں کی طرح نظر آنے کا مشورہ دے دیا۔

نجی میڈیا  سے گفتگو کرتے ہوئے شاہدآفریدی  نے کہا کہ بابر اعظم مسلسل 3 سالوں سے پاکستان ٹیم کی کپتانی کررہے ہیں، بابر کی ٹیم میں کئی سالوں سے  زیادہ تر یہی لڑکے کھیل رہے ہیں، میرا نہیں خیال کہ بابر کی ٹیم میں زیادہ چینج آیا ہوگا۔

انہوں نے کہا کہ کوئی شک نہیں ورلڈکپ کے میچز میں بابر سمیت پوری ٹیم پر پریشر ہوگا لیکن ہمیں سمجھنا ہوگا کہ  انٹرنیشنل کرکٹ پریشر کا ہی کھیل ہے۔

ایک کپتان  ہی جانتا ہے کہ  اس کی ٹیم میں میچ ونرز کون ہیں: شاہد آفریدی 

شاہد آفریدی کا کہنا تھا کہ  اب  یہ کپتان اور سینئر اسٹاف کا کام ہے کہ وہ پلیئر کو آن بورڈ لے، ان سے اچھی گیدرنگ کرے کیوں کہ  ایک کپتان کو ہی پتا ہوتا ہے کہ ٹیم میں میچ ونرز کون ہیں، گراؤنڈ کے اندر بابر نے ہی  ٹیم کو لے کر چلنا ہے۔

سابق کپتان نے مشورہ دیتے ہوئے کہا کہ دوران میچ  ہر وکٹ گرنے کے بعد بابر کے ساتھ گراؤند میں 2 سے 3 لڑکے نظر آئیں، مینجمنٹ کو چاہیے کہ بابر کو کہیں بھی گرنے نہ دیا جائے، بابر کو اسٹرونگ رکھے، بابر  کی باڈی لینگویج گراؤنڈ میں مثبت رہنی چاہیے، ان کو چاہیے کہ وہ گراؤنڈ میں ہر وقت جارحانہ نظر آئیں،  یہی وہ چیزیں ہیں جو ورلڈکپ میں اہم کردار ادا کریں گی۔

سابق کپتان نے مزید کہا کہ ورلڈکپ ایک  بہت بڑا ایونٹ ہے، وارم اپ میچز کی بات الگ ہے لیکن ورلڈکپ کے  میچز میں ٹیم پر پریشر ہوگا، ہم سب باہر بیٹھ کر ٹیم میں بابر کو سپورٹ کررہے ہیں، ان کیلئے  ہم سب کا پیغام ہےکہ پاکستانی قوم اور سابق کھلاڑی بابر کو سپورٹ کررہے ہیں، اتنی سپورٹ کے بعد لیڈرز پر  بھی ذمہ داریاں بڑھ جاتی ہیں  تو پھر بابر پر ذمہ داری آتی ہے کہ باڈی لینگویج شیروں والی رکھے۔