حالیہ کشیدہ صورتحال اور فلسطینیوں کیخلاف تشدد کا ذمہ دار صرف اسرائیل ہے: قطر

قطر  نے اسرائیل فلسطین کشیدہ صورت حال کی مذمت کرتے ہوئے تمام تر ذمہ داری اسرائیل  پر عائد کی ہے۔

ایک بیان میں قطری وزارت خارجہ کا کہنا تھا کہ حالیہ کشیدہ صورت حال اور تشددکا ذمہ دار  صرف اسرائیل ہے، حالیہ کشیدگی میں فریقین سے تحمل کا مطالبہ کرتے ہیں۔

قطری وزارت خارجہ نے مطالبہ کیا ہےکہ عالمی برادری اسرائیل کو ان  واقعات کا بہانہ بنا کر فلسطینیوں پر جنگ مسلط کرنے سے روکے۔

دو ریاستی حل ہی خطے میں سلامتی اور امن کا ضامن ہے: سعودی عرب

اس  حوالے سے سعودی وزارت خارجہ نے اپنے بیان میں کہا ہےکہ  فلسطین کی غیر معمولی صورت حال کا جائزہ  لے رہے ہیں، فلسطین اسرائیل کشیدگی میں متعدد محاذوں پر تشدد کے واقعات  ہوئے ہیں، فریقین سے تشدد فوری  روکنےکا مطالبہ کرتے ہیں۔

سعودی وزارت خارجہ کا کہنا ہےکہ فریقین شہریوں کے تحفظ کا خیال رکھیں اور  تحمل سےکام لیں، سعودی عرب نے پہلے ہی فلسطینیوں کے خلاف اشتعال انگیز کارروائیوں کے تباہ کن نتائج سے خبردار کردیا تھا۔

سعودی وزارت خارجہ نے مطالبہ کیا ہےکہ عالمی برادری اپنی ذمہ داریاں نبھانے اور امن کے لیے دو ریاستی حل پرکام کرے، دو ریاستی حل ہی خطے میں سلامتی، امن اور شہریوں کی حفاظت کا ضامن ہے۔

 حماس کےحملے فلسطینیوں کے پراعتماد ہونےکا مظہر ہیں: ایران

اس معاملے پر ایک بیان میں ایرانی وزارت خارجہ نےکہا ہےکہ حماس کے اسرائیل پر حملے فلسطینیوں کے پر اعتماد ہونےکا مظہر ہیں، حماس کے  آپریشن میں سرپرائز اور دیگر مشترکہ طریقے استعمال کیےگئے۔

ترجمان  ایرانی وزارت خارجہ کا کہنا ہےکہ حماس کے  آپریشن کا طریقہ کار  قابضین کے خلاف فلسطینی عوام کے اعتماد کو ظاہرکرتا ہے۔

 بین الاقوامی برادری عالمی قوانین کے تحت کشیدگی رکوائے: عمان

عمان نے مطالبہ کیا ہےکہ  اسرائیل اور فلسطین زیادہ سے زیادہ  تحمل سےکام لیں، بین الاقوامی برادری اسرائیل  اور فلسطین میں کشیدگی رکوانےکی کوشش کرے۔

عمان نےکہا ہےکہ بین الاقوامی برادری عالمی قوانین کے تحت کشیدگی رکوائے۔

خیال رہے کہ ہفتے کی صبح غزہ سے اسرائیل پر 5000 راکٹ فائر کیے گئے جس کے بعد فلسطین اور اسرائیل میں جنگ چھڑ گئی، فلسطینی مزاحمتی تحریک حماس کے اسرائیل پر زمین، سمندر اور فضا سے حملے جاری ہیں جس میں صیہونی فوجیوں سمیت 40 اسرائیلی ہلاک، سیکڑوں زخمی اور درجنوں یرغمال بنالیے گئے۔

امریکی میڈیا کے مطابق حماس کے ملٹری ونگ نے اسرائیل کے خلاف آپریشن الاقصی طوفان کا اعلان کرتے ہوئے آج صبح 5 ہزار راکٹ فائر کیے۔

بین الاقوامی میڈیا رپورٹس کے مطابق فلسطین اور اسرائیل کے درمیان نئی جنگ چھڑ گئی، غزہ سے اسرائیل پر ہزاروں راکٹ حملے ہوئے، غزہ سے راکٹ حملوں کے بعد تل ابیب سمیت پورے اسرائیل میں جنگ کے سائرن گونج اٹھے۔

جواب میں اسرائیل نے بھی غزہ پر فضائی حملےکیے ہیں جن میں200 سے زائد فلسطینی شہید اور سیکڑوں زخمی ہوچکے ہیں۔

فلسطین اور اسرائیل کے درمیان نئی جنگ، حماس کے اسرائیل پر زمین، سمندر اور فضا سے حملے، 40 صیہونی ہلاک

حماس نے اسرائیل میں اپنی سہ طرفہ کارروائی کو آپریشن الاقصیٰ فلڈ کا نام دیا ہے، حملے میں سیکڑوں صیہونی زخمی اور درجنوں یرغمال بنالیے گئے

حماس کے اسرائیل پر حملے، اسماعیل ہانیہ کے سجدہ شکر کی ویڈیو جاری

حماس کی القسام بریگیڈ نے پہلے ہزاروں راکٹ داغے اور پھر پیدل دستے سرحدی باڑھ توڑ کر اسرائیل میں داخل ہوئے