کھیل

ذہن میں ہے نیوزی لینڈ کیخلاف رن ریٹ پر کیسے برتری لینی ہے: مکی آرتھر

03 نومبر ، 2023

اندازہ ہے کہ بنگلورو میں ہائی اسکوررنگ گیم ہوتے ہیں، اعداد و شمار دیکھ کر اپنی حکمت عملی بنا رہے ہیں: ڈائریکٹر کرکٹ پی سی بی۔ فوٹو فائل

پاکستان کرکٹ ٹیم کے ڈائریکٹر مکی آرتھر کا کہنا ہے نیوزی لینڈ کے خلاف میچ کے لیے ہر طرح کا سیناریو ہمارے پاس موجود ہے۔

چنا سوامی اسٹیڈیم میں پریس کانفرنس کرتے ہوئے مکی آرتھر کا کہنا تھا شاداب خان کے عبوری ٹیسٹ ہوئے جو بظاہر ٹھیک ہیں تاہم فی الحال ہم شاداب پر کوئی فیصلہ کرنے کی پوزیشن میں نہیں ہیں۔

مکی آرتھر کا کہنا تھا ہمارے کھلاڑیوں کیلئے ہر وینیو ایک نیا وینیو ہے، کھلاڑیوں نے ٹی وی پر آئی پی ایل اور ٹیسٹ میچز دیکھے ہیں، ہم ہر گیم جیتنے کیلئے میدان میں اترتے ہیں۔

ان کا کہنا تھا مسلسل سفر کھلاڑیوں کیلئے کوئی مسئلہ نہیں ہے لیکن سخت سکیورٹی کے باعث پریشانی ہے، مشکل ہوتی ہے، ایسا لگتا ہے کہ ہم پھر کووڈ کے وقت میں چلے گئے ہیں، پلیئرز اپنی مرضی سے کہیں آ جا نہیں سکتے، ایسی صورتحال ٹیم پر اثرانداز ہوتی ہے۔

یہ بھی پڑھیں

نیوزی لینڈ کے خلاف میچ کے حوالے سے مکی آرتھر کا کہنا تھا اندازہ ہے کہ یہاں ہائی اسکوررنگ گیم ہوتے ہیں، اعداد و شمار دیکھ کر اپنی حکمت عملی بنا رہے ہیں، ہمارے ذہن میں ہے کہ نیٹ رن ریٹ پر نیوزی لینڈ سے کیسے برتری لینی ہے، ہر طرح کا سیناریو ہمارے پاس موجود ہے، ضروری نہیں کہ میں پلیئرز کو ابھی بتاؤں کہ کیا سیناریو ہے۔

ڈائریکٹر پاکستان کرکٹ ٹیم کا کہنا تھا نیوزی لینڈ کا بطور حریف احترام کرتے ہیں لیکن ہماری پہلی ترجیح میچ جیتنا ہے جب جیت کی پوزیشن میں آئیں گے تو پھر سیناریو دیکھیں گے۔

ایک سوال کے جواب میں مکی آرتھر کا کہنا تھا حارث رؤف ہمارا اہم بولر ہے، اس کو تبدیل نہیں کریں گے، ممکن ہے کہ کل کے میچ میں چینج گیم پلان کے ساتھ میدان میں اتریں۔