کھیل

بابر کی کپتانی سے متعلق مشاورت مکمل، ایک فارمیٹ کیلئے کپتان رہنے کے حق میں نہیں

15 نومبر ، 2023

بابر اعظم کو صرف ایک فارمیٹ ریڈ بال کی کپتانی کا کہا گیا تو وہ کپتانی سے ہی دستبردار ہو جائیں گے: ذرائع. فوٹو فائل

قومی ٹیم کے کپتان بابر اعظم نے پاکستان کرکٹ ٹیم کی قیادت سے متعلق قریبی لوگوں سے مشاورت مکمل کر لی۔

قومی کرکٹ ٹیم کے کپتان بابر اعظم چیئرمین پی سی بی مینجمنٹ کمیٹی ذکا اشرف سے ملاقات کے لیے پی سی بی ہیڈ کوارٹر پہنچ گئے ہیں۔

بابر اعظم چیئرمین پی سی بی کو ورلڈکپ میں قومی ٹیم کی کارکردگی اور اپنی کپتانی کے حوالے سے آگاہ کریں گے۔

ذرائع کا بتانا ہے کہ بابر اعظم نے ذکا اشرف سے ملاقات سے قبل اپنے قریبی لوگوں سے ٹیم کی کپتانی سے متعلق مشاورت بھی کی۔

یہ بھی پڑھیں

ذرائع کا کہنا ہے کہ بابر اعظم ایک فارمیٹ کے لیے پاکستان کرکٹ ٹیم کے کپتان برقرار رہنے کے حق میں نہیں ہیں، بابر اعظم کو صرف ایک فارمیٹ ریڈ بال کی کپتانی کا کہا گیا تو وہ کپتانی سے ہی دستبردار ہو جائیں گے۔

ذرائع کا بتانا ہے کہ بابر اعظم نے واٹس ایپ میسیجز لیک ہونے کے معاملے پر بھی اپنے قریبی لوگوں سے قانونی مشاورت کی، بابر اعظم واٹس ایپ میسجز لیک ہونے پر قانونی چارہ جوئی کا ارادہ رکھتے ہیں۔

یاد رہے کہ ورلڈکپ میں پاکستان کرکٹ ٹیم کی انتہائی بری پرفارمنس کے بعد پاکستان کرکٹ بورڈ نے قومی ٹیم کے پوسٹ مارٹم کا فیصلہ کیا ہے۔

پاکستان کرکٹ ٹیم کے چیف سلیکٹر انضمام الحق نے ورلڈکپ کے دوران ہی اپنے عہدے سے استعفیٰ دے دیا تھا جبکہ بولنگ کوچ مورنی مورکل بھی چند روز قبل عہدے سے استعفیٰ دے چکے ہیں۔

ذرائع کا بتانا ہے کہ پی سی بی کی مینجمنٹ کمیٹی کے اراکین تمام غیر ملکی کوچز کو ہٹا کر ان کی جگہ سابق قومی کرکٹرز کو عہدے دینے کا سوچ رہی ہے اور اس حوالے سے ذکا اشرف کی سابق قومی کرکٹرز سے ملاقاتیں بھی جاری یں۔