نقصان دہ اجزاء کا انکشاف، حکومت پنجاب نے کھانسی کے 5 سیرپس پر پابندی لگا دی

پنجاب حکومت نے لاہورکی فارماسیوٹیکل کمپنی کے بنائے ہوئے کھانسی کے سیرپ میں نقصان دہ اجزاء کا انکشاف ہونے کے بعد کھانسی کے پانچ سیرپس پر پابندی عائد کر دی۔

نگران وزیر پرائمری و سیکنڈری ہیلتھ کیئر ڈاکٹر جمال ناصر نے اپنے بیان میں کہا ہے کہ  حکومت پنجاب نے کھانسی کے پانچ سیرپس پر پابندی لگا دی ہے۔

ڈاکٹر جمال ناصر کے مطابق لاہور میں تیارکردہ کھانسی کے یہ سیرپس بیرون ملک بھی سپلائی کیے جاتے تھے۔

انہوں نے بتایا کہ سیرپس میں مالدیپ کی شکایت پر ڈبلیو ایچ او کی تحقیقات میں الکوحل کی زیادہ مقدارکی تصدیق ہوئی ،ڈرگ ریگولیٹری اتھارٹی (ڈریپ) کی سفارش پر حکومت پنجاب نے پانچوں سیرپس کی فروخت روک دی  ہے۔

لاہورکی فارماسیوٹیکل کمپنی کے کھانسی کے سیرپ میں نقصان دہ اجزاء کا انکشاف

کھانسی کے سیرپ میں نقصان دہ ڈائی ایتھلین گلائکول اور ایتھلین گلائکول نامی کثافتیں پائی گئی ہیں

ڈاکٹر جمال ناصر نے کہا کہ پنجاب کے تمام میڈیکل اسٹوروں سے ان سیرپس کا اسٹاک فوری طور پر اٹھایا جا رہا ہے جبکہ سیرپ تیار کرنے والی فیکٹری کو سر بمہر کیا جا رہا ہے۔

واضح رہے اس سے پہلے بھارتی کف سیرپس میں موجود انہی کثافتوں سے کئی بچوں کی اموات ہو چکی ہیں۔