اوپن اے آئی کا برطرف کیے جانے والے چیف ایگزیکٹو کو دوبارہ بحال کرنے پر غور

19 نومبر ، 2023

17 نومبر کو چیٹ جی پی ٹی تیار کرنے والی کمپنی اوپن اے آئی نے سام آلٹمین کو چیف ایگزیکٹو آفیسر (سی ای او) کے عہدے سے فارغ کر دیا تھا۔

مگر اب ایک رپورٹ میں انکشاف کیا گیا ہے کہ کمپنی ایک بار پھر انہیں دوبارہ سی ای او کے عہدے پر بحال کرنے پر غور کر رہی ہے۔

اوپن اے آئی کے بورڈ آف ڈائریکٹرز نے سام آلٹمین کو ان کے عہدے سے نکالنے کا اعلان کیا تھا۔

اس وقت کمپنی کی جانب سے جاری بیان میں کہا گیا تھا کہ سام آلٹمین کی جانب سے کیے جانے والے فیصلوں پر بورڈ کو اعتماد میں نہ لینے پر انہیں عہدے سے ہٹایا جا رہا ہے۔

مگر اس نئی رپورٹ میں سام آلٹمین کے قریبی ذرائع کے حوالے سے بتایا گیا کہ بورڈ کی جانب سے ایک بار سابق سی ای او کو ان کے عہدے پر بحال کرنے پر غور کیا جا رہا ہے۔

سام آلٹمین کو فارغ کیے جانے کے بعد کمپنی کے متعدد عہدیداران بشمول صدر گریگ بروک مین نے بھی احتجاجاً اپنے عہدوں سے استعفے دے دیے تھے۔

اس کمپنی میں کام کرنے والے مزید افراد کی جانب سے ملازمت چھوڑے جانے کا امکان ہے۔

سام آلٹمین کو نکالے جانے کے بعد میرا مورتی نامی خاتون کو کمپنی کا عارضی سی ای او بنا دیا گیا ہے۔

حیران کن طور پر سام آلٹمین کو برطرفی سے محض 5 سے 10 منٹ قبل اس فیصلے سے آگاہ کیا گیا تھا۔

کچھ رپورٹس کے مطابق سام آلٹمین کی جانب سے اب ایک نئے آرٹی فیشل انٹیلی جنس (اے آئی) کمپنی کو متعارف کرایا جا سکتا ہے۔