06 دسمبر ، 2023 
اے آئی ٹیکنالوجی کی مدد سے گرگٹ کی طرح رنگ بدلنے والا لباس تیار
06 دسمبر ، 2023
کیا آپ یقین کریں گے کہ بہت جلد آپ اپنے لباس کو اپنی پسند کے کسی بھی رنگ میں محض ہاتھ کے اشارے سے تبدیل کر سکیں گے؟
جی ہاں واقعی ایسا آرٹی فیشل انٹیلی جنس (اے آئی) ٹیکنالوجی کی بدولت ممکن ہونے والا ہے۔
ہانگ کانگ کی لیبارٹری فار آرٹی فیشل انٹیلی جنس ان ڈیزائن (اے آئی ڈی لیب) کے ماہرین نے اے آئی ٹیکنالوجی کے ذریعے رنگ بدلنے والا لباس تیار کیا ہے جس میں ایک ننھا کیمرا بھی موجود ہے۔
اے آئی ڈی لیب کے مطابق یہ ٹیکنالوجی لوگوں کو مختلف رنگوں کے اضافی ملبوسات خریدنے سے روکے گی جس سے کچرے میں کمی لانے میں مدد ملے گی۔
اس کپڑے میں آپٹیکل فائبر اور اون کو استعمال کیا گیا ہے اور اس سے تیار کردہ لباس گرگٹ کی طرح رنگ بدلتا ہے۔
مثال کے طور پر فیس بک کے لائیک بٹن کی طرح انگوٹھے کو اوپر کرنے پر لباس گہرے نیلے رنگ کا ہو جاتا ہے جبکہ ہاتھ سے دل بنانے پر لباس گلابی رنگ کا ہو جاتا ہے اور اوکے (OK) سائن سے وہ سبز ہو جاتا ہے۔
لباس میں نصب کیمرا ہاتھوں کے اشارے کو سمجھ کر رنگ بدلنے میں مدد فراہم کرتا ہے۔
ماہرین کے مطابق لباس کے رنگوں کو فون پر ایک ایپ کے ذریعے بھی بدلنا ممکن ہے۔
تحقیقی ٹیم کی سربراہ پروفیسر Jeanne Tan نے بتایا کہ یہ لباس بہت نرم ہے۔
انہوں نے کہا کہ اس کو چھونے سے کسی عام لباس جیسا ہی احساس ہوتا ہے۔
ماہرین کو توقع ہے کہ مستقبل قریب میں اس ٹیکنالوجی کا استعمال عام ہو جائے گا، فی الحال اس سے تیار کردہ ملبوسات کو شاپنگ سینٹرز اور ایسے ہی دیگر عوامی مقامات پر رکھا گیا ہے۔
مزید خبریں :
ٹک ٹاک سے کمانے کیلئے کتنے فالوورز ضروری ہیں؟
20 دسمبر ، 2024
ایپل کا سب سے پتلا آئی فون دیکھنے میں کیسا ہوگا؟
20 دسمبر ، 2024
کیا آپ کو معلوم ہے کہ لیزر کن الفاظ کا مخفف ہے؟
18 دسمبر ، 2024
