17 دسمبر ، 2023 
الجزیرہ کا فلسطین میں اپنے صحافی کے قتل پر عالمی فوجداری عدالت سے رجوع کرنے کا فیصلہ
17 دسمبر ، 2023
قطر کے نشریاتی ادارے الجزیرہ نے فلسطین میں اپنے صحافی کے قتل پر عالمی فوجداری عدالت سے رجوع کرنے کا فیصلہ کیا ہے۔
اسرائیل نے غزہ میں اپنی جارحیت جاری رکھی ہوئی ہے اور گزشتہ روز خان یونس میں فضائی حملے میں الجزیرہ کا کیمرامین ثمر ابوداقہ اپنے فرائض کی انجام دہی کے دوران شہید ہوگیا تھا۔
الجزیرہ کے کیمرامین ثمر ابوداقہ کے ساتھ الجزیرہ غزہ کے بیورو چیف وائل دحدود بھی زخمی ہوئے تھے جن کا پورا خاندان اکتوبر میں ہونے والے اسرائیلی فضائی حملے میں شہید ہو گیا تھا۔
الجزیرہ نے کہا کہ اپنے صحافی کے قتل پر عالمی فوجداری عدالت سے رجوع کریں گے اور کیمرہ مین ثمرابوداقہ کے'قتل' کا معاملہ ہیگ کی عدالت بھجوانے کیلئے قانونی ٹیم کو ہدایت کر دی ہے۔
دوسری جانب عرب میڈیا کی جانب سے بتایا گیا ہے کہ اسرائیل نے مغربی کنارے کے نورالشمس مہاجر کیمپ پر حملہ کیا ہے۔
میڈیا رپورٹس کے مطابق حملے کے بعد اسرائیلی فورسز ایمبولینسوں کو مہاجر کیمپ جانے سے روک رہی ہیں جس کے سبب طبی امداد نہ پہنچنے پر 2 زخمی فلسطینی دم توڑ گئے۔
عرب میڈیا نے مزید بتایا کہ اسرائیلی فورسز نے ایمبولینس کے اندر سے طبی عملے کے اہلکار کو بھی گرفتار کر لیا ہے۔
یاد رہے کہ غزہ میں 7 اکتوبر سے اب تک جاری اسرائیلی بمباری سے شہید فلسطینیوں کی تعداد 19 ہزار 76 سے تجاوز کرچکی ہے جبکہ 50 ہزار سے زائد فلسطینی زخمی ہو گئے ہیں، شہید اور زخمی ہونے والوں میں نصف سے زائد تعداد صرف بچوں اور خواتین پر مشتمل ہے۔
مزید خبریں :
حزب اللہ کے راکٹ حملے میں اسرائیلی شہری ہلاک
7 گھنٹے پہلے
چچا کے تھپڑ مارنے پر 3 سالہ بھتیجی جان سے چلی گئی
7 گھنٹے پہلے
