عمران اور بشریٰ نے 58 تحائف کم مالیت ظاہر کرکے 14 کروڑ میں رکھ لیے، توشہ خانہ ریفرنس دائر

قومی احتساب بیورو (نیب) نے سابق وزیر اعظم و سابق چیئرمین پاکستان تحریک انصاف عمران خان اور ان کی تیسری اہلیہ بشریٰ بی بی کے خلاف توشہ خانہ ریفرنس دائر کردیا۔

ذرائع کے مطابق نیب نے توشہ خانہ ریفرنس احتساب عدالت میں دائر کیا۔ ذرائع کا بتانا ہے کہ نیب پراسیکیوٹر سہیل عارف نے تفتیشی افسران کے ہمراہ توشہ خانہ ریفرنس دائر کیا۔

ذرائع کا کہنا ہے کہ احتساب عدالت کے رجسٹرار آفس نے نیب توشہ خانہ ریفرنس کی جانچ پڑتال شروع کردی۔

توشہ خانہ کیس: عمران خان کی عبوری ضمانت خارج، نیب نے جیل میں گرفتاری ڈال دی

جسمانی ریمانڈ کے باوجود عمران خان جیل میں ہی رہیں گے اور ان سے جیل میں ہی تفتیش ہوگی: عدالت کا حکم

ریفرنس میں کہا گیا ہے کہ 108 میں سے بانی پی ٹی آئی، بشریٰ بی بی نے 14 کروڑ روپے مالیت کے 58 تحائف اپنے پاس رکھے، تحائف کم مالیت ظاہر کرکے اپنے پاس رکھے گئے۔

دوران تفتیش معلوم ہوا بشریٰ بی بی کو سعودی ولی عہد سے جیولری سیٹ تحفے میں ملا جو توشہ خانہ میں جمع ہی نہیں کروایا، سعودی ولی عہد سے ملنے والا جیولری سیٹ انتہائی کم رقم کے عوض رکھا گیا اور بشریٰ بی بی، بانی پی ٹی آئی نے اتھارٹی کا استعمال کرتے ہوئے جیولری سیٹ کی من پسند قیمت لگوائی۔

توشہ خانہ قوانین کے مطابق تمام تحائف توشہ خانہ میں رپورٹ کرنے لازم ہیں، جیولری سیٹ ملٹری سیکرٹری کے ذریعے توشہ خانہ میں رپورٹ تو ہوا لیکن جمع نہیں کروایاگیا، ملزمان تحائف توشہ خانہ میں جمع کروانے کے پابند تھے تاہم انہوں نے ایسا نہ کر کے توشہ خانہ قوانین کی خلاف وزری کی۔

ذرائع کے مطابق جیولری سیٹ کی قیمت کا تخمینہ لگانے والے صہیب عباسی وعدہ معاف گواہ بن گئے ہیں جن کا کہنا ہے کہ دباؤ میں آکر جیولری سیٹ کی کم قیمت لگائی۔ صہیب عباسی کی خدمات پرائیوٹ طور پر لی گئی تھیں۔

خیال رہے کہ گزشتہ دنوں اسلام آباد کی احتساب عدالت نے پاکستان تحریک انصاف کے سابق چیئرمین عمران خان کی توشہ خانہ کیس میں عبوری ضمانت خارج کردی تھی۔

ضمانت خارج ہونے کے بعد نیب نے جیل میں ہی عمران خان کی گرفتاری ڈال دی تھی۔