21 دسمبر ، 2023 
پہلی ساف کلب فٹبال چیمپئن شپ میں پاکستانی کلب کی شرکت کا معاملہ کھٹائی میں پڑ گیا
21 دسمبر ، 2023
اگلے سال شیڈولڈ پہلی ساف کلب فٹبال چیمپئن شپ میں پاکستانی کلب کی شرکت کا معاملہ کھٹائی میں پڑ گیا ہے۔
پاکستان فٹبال فیڈریشن( پی ایف ایف) کی ایونٹ کیلئے کلب کو نامزد کرنے کی کوششوں پر کلبز کی جانب سے حوصلہ افزا جواب نہیں ملا۔
ہوم ایند اووے کی بنیاد پر پہلی ساف کلب فٹبال چیمپئن شپ جون 2024 میں ہونا شیڈولڈ ہے، ساؤتھ ایشین فٹبال فیڈریشن( ساف) نے آٹھ ٹیموں پر مشتمل ایونٹ کیلئے پاکستان کو بھی کلب بھیجنے کی دعوت دی تھی ۔
ملک میں ڈومیسٹک فٹبال کی معطلی کی وجہ سے پی ایف ایف نے پاکستان لیگ کے آخری ایڈیشن میں شریک تین کلبز (افغان کلب، مسلم کلب اور بلوچ کلب نوشکی ) کو دعوت دی کہ ان کے درمیان دسمبر میں ایک ٹورنامنٹ کرایا جائے اور اس ٹورنامنٹ کی فاتح ٹیم کو چیمپئن شپ میں بھیجا جائے۔
تاہم پی ایف ایف کی دعوت پر کلبز کی جانب سے فنڈز کی قلت اور وقت کی کمی کی وجہ سے مثبت جواب نہیں ملا اور پی ایف ایف ساف کی ڈیڈ لائن تک حتمی ٹیم کا نام نہ دے سکا۔
ساف نے پاکستان سے کہا تھا کہ دسمبر کی 15 تاریخ تک وہ کلب کو نامزد کر دے تاکہ ایونٹ کے انتظامات شروع ہوسکے ۔
واضح رہے کہ پاکستان فٹبال فیڈریشن نے ایونٹ کیلئے ڈپارٹمنٹل ٹیموں کو نہ بھیجنے کا فیصلہ کیا تھا جس پر پی ایف ایف کو تنقید کا بھی سامنا رہا تھا۔
