27 دسمبر ، 2023 
پشاور سے قومی اسمبلی کی نشست کیلئے شیر افضل اور پی ٹی آئی کی مقامی قیادت آمنے سامنے
27 دسمبر ، 2023
پاکستان تحریک انصاف خیبر پختونخوا کی قیادت شیرافضل مروت کو این اے 32 پشاور سے امیدوار بنانے پر رضامند نہیں جبکہ نائب صدر پی ٹی آئی شیر افضل مروت کا کہنا ہے کہ میں بانی چیئرمین کے حکم پر پشاور سے انتخابات لڑوں گا۔
پاکستان تحریک انصاف خیبر پختونخوا کی قیادت شیرافضل مروت کو این اے 32 سے امیدوار بنانے پر رضامند نہیں ہے۔
ذرائع کے مطابق پاکستان تحریک انصاف کی صوبائی قیادت این اے 32 کے لیے کسی مقامی رہنما کو امیدوار بنانا چاہتی ہے۔
پی ٹی آئی کے سینئر نائب صدر تیمور سلیم جھگڑا کا اس حوالے سے کہنا ہے کہ بہتر ہوگا پشاور کی نشست پر پشاور کا ہی رہنماء الیکشن لڑے، کس نے کہاں سے الیکشن لڑنا ہے، یہ فیصلہ پارٹی نے کرنا ہے۔
دوسری جانب شیر افضل مروت نے کہا کہ مجھے بانی چیئرمین پی ٹی آئی نے پشاور سے انتخابات لڑنے کا حکم دیا ہے اور میں ان کے حکم پر پشاور سے انتخابات لڑوں گا۔
خیال رہے کہ شیر افضل مروت نے این اے 32 پشاور سے کاغذات نامزدگی جمع کرائے ہیں اور ان کا دعویٰ ہے کہ 8 فروری کو ہونے والے انتخابات میں تحریک انصاف جیتے گی۔
