27 دسمبر ، 2023 
راولپنڈی: آئل ریفائنری کی سپلائی لائن میں آگ تیل چوری کے دوران لگی، آئل فیلڈ حکام
27 دسمبر ، 2023
دو روز قبل راولپنڈی کے علاقے دھمیال جوڑیاں میں اٹک آئل ریفائنری کی سپلائی لائن میں دھماکے کے بعد آگ لگنے کے واقعہ کی تحقیقات میں آئل فیلڈ حکام نے آگ سے متاثرہ گھر میں آئل اسٹوریج کیلئے بنائے گئے دو خفیہ ٹینک کا سراغ لگایا ہے۔
آئل فیلڈ حکام کی تحقیقات کے مطابق متاثرہ گھر میں آئل اسٹوریج کے لیے بنائے گئے دو خفیہ ٹینک کا سراغ لگایا گیا ہے، ملزمان مین سپلائی لائن سے آئل چوری کرنے کے بعد ٹینک میں محفوظ کرتے تھے۔
آئل فیلڈ حکام کا کہنا ہے کہ ملزمان نے سلیم نامی پراپرٹی ڈیلر سے گھر 15 روز قبل کرائے پر حاصل کیا تھا، کرائے داروں میں راجہ غلام مصطفیٰ محمد سرفراز، محمد اسلم اور سردار طارق شامل ہیں۔
آئل فیلڈ حکام کے مطابق ملزمان نے تیل پائپ لائن سے 10 انچ کا سوراخ کر رکھا تھا، تیل چوری کرنے کے لیے 20 فٹ لمبا پائپ استعمال کیا جارہا تھا۔ملزمان نے 84 لاکھ روپے سے زائد کا خام تیل چوری کیا ہے، آئل پائپ لائن سے 316 ڈرم تیل چوری کیا گیا ہے، چوری کیا گیا کروڑوں مالیت کا آئل برآمد کر لیا گیا ہے۔
راولپنڈی پولیس نے مالک مکان محمد کبیر خان اور چار کرائے داروں کے خلاف مقدمہ درج کرلیا ہے، کمشنر راولپنڈی کی ہدایت پر آئل چوری کے معاملے پر مزید تحقیقات جاری ہیں۔
حکام کے مطابق چاروں کرائے داروں کو گرفتار کرنے کے لیے چھاپے مارے جارہے ہیں۔
واضح رہے کہ دو روز قبل آئل چوری کے دوران دھماکے کے بعد خوفناک آتشزدگی کا واقعہ پیش آیا تھا، آگ کے باعث متعدد گھر وں کو نقصان پہنچا تھا۔
