اسلام آباد: مذاکراتی کمیٹی کی سفارش پر مزید 34 بلوچ مظاہرین رہا

اسلام آباد: حکومت کی مذاکراتی کمیٹی کی سفارش پر مزید 34 بلوچ مظاہرین رہا کر دیے گئے ہیں۔

رپورٹس کے مطابق گرفتار بلوچ مظاہریں کو تمام قانونی تقاضے پورے کرنے کے بعد رہا کیا گیا۔

واضح رہے کہ فوادحسن فواد، مرتضیٰ سولنگی، جمال شاہ،گورنربلوچستان نے مظاہرین سے مذاکرات کیے تھے جس  کے دوران مظاہرین نے گرفتار افراد کی فوری رہائی کا مطالبہ کیا تھا۔

مذاکرات کے پہلے دن کمیٹی نے گرفتار خواتین اور بچوں کی فوری رہائی کے احکامات جاری کیے تھے۔اس سے قبل گزشتہ روز بلوچ یکجہتی کمیٹی کےڈاکٹر ظہیربلوچ کو اڈیالہ جیل سےرہا کیا گیا تھا۔

بلوچ یکجہتی کمیٹی کے رہنما ڈاکٹر ظہیر بلوچ کو اڈیالہ جیل سے رہا کردیا گیا

کچھ مظاہرین کو آپ گود میں بٹھالیتے ہیں، کچھ کے ساتھ یہ حال کرتے ہیں: بلوچ مارچ شرکا کی گرفتاری سے متعلق کیس کی سماعت پر عدالت کے ریمارکس

دوسری  جانب اسلام آباد میں نیشنل پریس کلب کے باہر بلوچ یکجہتی کمیٹی کے دھرنے میں پولیس نے مظاہرین کو نیا اسپیکر لانے سے روک دیا۔

دھرنے میں نیا اسپیکر لانے سے روکنے پر بلوچ یکجہتی کمیٹی کے کارکن اور پولیس آپس الجھ پڑے ،پولیس کا کہنا تھا کہ ایمپلی فائر ایکٹ کی خلاف ورزی ہوئی تو کارروائی کریں گے۔

مظاہرین کے مطابق اسپیکر چند روز پہلے نقاب پوش نا معلوم افراد اٹھاکر لے گئے تھے۔