سحری اور افطاری میرے شوہر بناتے ہیں: صرحا اصغر
20 مارچ ، 2024
پاکستانی اداکارہ صرحا اصغر کا کہنا ہے کہ رمضان میں ان کے شوہر لالہ عمر مرتضیٰ ہی تمام کھانے پکاتے ہیں اور وہ صرف چکھنے کا کام ہی کرتی ہیں۔
حال ہی میں اداکارہ نے رمضان ٹرانسمیشن میں شرکت کی جس میں انہوں نے اپنی زندگی میں شادی کے بعد آنے والی مثبت تبدیلیوں کے حوالے سے بات کی، اداکارہ نے اپنے شوہر کی تعریف کی۔
انہوں نے بتایا کہ شادی سے قبل میں اپنی بہن کے ہمراہ سحری اور افطاری بنایا کرتی تھی لیکن اب شادی کے بعد یہ تمام ذمہ داری میرے شوہر نے لے لی ہے۔
جب ان سے پوچھا گیا کہ کیا وہ شوٹنگ کے شیڈول کی وجہ سے ایسا کرنے پر مجبور ہیں، تو صرحا نے جواب دیا کہ ان کے شوہر یہ سب محبت میں کرتے ہیں اور رمضان ان کے لیے ایک تہوار کی طرح ہے۔
اداکارہ نے بتایا کہ میرے سسرال والے یہاں نہیں رہتے، ان میں سے زیادہ تر بیرون ملک مقیم ہیں اور میری ساس بھی سفر کرتی رہتی ہیں، اس لیے گھر میں صرف ہم دونوں ہی ہوتے ہیں۔
صرحا نے کہا کہ میرے شوہر کو کھانے کا کافی شوق ہے اسی لیے وہ چاہتے ہیں کہ دسترخوان وسیع ہو، میں انہیں کہتی ہوں کہ جو کھانا چاہیں خود پکا لیں۔
واضح رہے کہ اداکارہ صرحا اصغر نے دسمبر 2020 میں لالہ عمر مرتضیٰ کے ساتھ شادی کی تھی، جوڑے کے ہاں نومبر 2022 میں بیٹے کی پیدائش ہوئی تھی۔
