پنجاب حکومت کا زرعی اراضی کےکمرشل استعمال کے معاملےکو ریگولرائز کرنےکا فیصلہ

پنجاب  حکومت نے شہروں سے ملحق زرعی اراضی تیزی سے ہاؤسنگ سوسائٹیز میں بدلنے کا نوٹس لیتے ہوئے زرعی اراضی کے کمرشل استعمال کے معاملےکو ریگولرائز کرنےکا فیصلہ کیا ہے۔

وزیراعلیٰ پنجاب مریم نواز کی قائم کردہ خصوصی کمیٹی کا وزیر بلدیات ذیشان رفیق کی زیر صدارت اجلاس ہوا۔

کمیٹی نے شہروں کے اردگرد زرعی اراضی کو تیزی سے ہاؤسنگ سوسائٹیز  میں بدلنے پر اظہار تشویش کیا۔

پنجاب کی زرعی زمین ہاؤسنگ سوسائٹیز کی نذر ہونے سے ملکی زراعت کو خطرات لاحق

ماہرین نے پنجاب میں مسلسل کم ہوتی زرعی زمین کے منفی اثرات اور ملک کے مستقبل کے بارے میں خطرے کی گھنٹی بجا دی ہے

وزیر بلدیات ذیشان رفیق کا کہنا تھا کہ  بڑھتی رہائشی ضروریات پوری کرنے کے ساتھ زرعی رقبےکا دانشمندانہ استعمال ضروری ہے، عمودی کی بجائے افقی تعمیرات کےکلچر کی طرف جانا ہوگا۔

 ذیشان رفیق کا کہنا تھا کہ  رئیل اسٹیٹ بزنس کا استحکام اور  زرعی اراضی کی حفاظت دونوں یقینی بنائیں گے۔ غیر قانونی ہاؤسنگ اسکیموں کو قانون کے دائرے میں لانا ضروری ہے۔

وزیر زراعت  سید عاشق کرمانی کا کہنا تھا کہ خالصتاً زرعی علاقوں میں بھی غیر منظور شدہ اسکیمیں بن رہی ہیں، ہاؤسنگ اسکیموں کی منظوری کے میکنزم میں بہتری لانا ہوگی۔

اجلاس میں ذیلی کمیٹیاں بنانے کا فیصلہ کیا گیا،کمیٹیاں پنجاب بھر کا ڈیٹا پیش کریں گی۔