28 اپریل ، 2024
سینئر اداکار نعمان اعجاز کا کہنا ہے کہ اگر وہ سنسر بورڈ کے چیئرمین بن گئے تو سارے ڈرامے بند کروا دیں گے۔
اداکار نعمان اعجاز نجی ٹی وی شو کے مہمان بنے جہاں ان سے میزبان کی جانب سے سوال پوچھا گیا کہ اگر آپ کو سنسر بورڈ کا چیئرمین بنایا جائے تو آپ کیا تبدیلی کریں گے؟
جس کا جواب دیتے ہوئے اداکار نے کہا کہ میں سارے ڈرامے بن کرا دوں گا کیونکہ ڈراموں میں رشتوں کی اتنی تذلیل ہو رہی ہے اور مجھے دکھ ہوتا ہے اپنی عوام پر کہ ان کو اٹھا کر پتھر کیوں نہیں مارتی۔
اداکار نے کہا کہ آپ لوگوں نے ماں، بہن، بھائی، ساس اور باپ سمیت سب رشتوں کو چڑیل اور برا دکھا دیا، جتنے بھی رشتے تھے ان کے تقدس کو پامال کر رہے ہیں، انہیں منفی دکھا رہے ہیں۔
نعمان اعجاز نے اپنی بات کو جاری رکھتے ہوئے مزید کہا کہ جب آپ معاشرے میں کوئی چیز دکھا رہے ہیں تو اس کا اثر پڑتا ہے، یہ بات سمجھنے کی ہے لیکن لوگ اس بات کو نہیں سمجھ رہے، جو جتنا زیادہ منفی کردار ہوتا ہے لوگ اسے سپر ہٹ کر دیتے ہیں۔