سائنس و ٹیکنالوجی

یوٹیوب میں اے آئی ٹیکنالوجی پر مبنی ایک دلچسپ فیچر کا اضافہ

ویب ڈیسک

07 مئی ، 2024

یہ فیچر یوٹیوب پریمیئم کے صارفین کو دستیاب ہوگا / رائٹرز فوٹو

یوٹیوب میں آرٹی فیشل انٹیلی جنس (اے آئی) ٹیکنالوجی پر مبنی فیچر Jump Ahead متعارف کرایا گیا ہے۔

یہ فیچر یوٹیوب پریمیئم کے صارفین کو دستیاب ہوگا اور فی الحال صرف اینڈرائیڈ ڈیوائسز پر ہی اسے استعمال کیا جا سکتا ہے۔

اس فیچر کی آزمائش مارچ میں شروع کی گئی تھی اور اس کے ذریعے صارفین کو کسی ویڈیو کو پورا دیکھنے کی ضرورت نہیں ہوگی۔

درحقیقت یہ فیچر صارفین کو براہ راست کسی ویڈیو کے سب سے دلچسپ حصے کی جانب لے جائے گا۔

یہ بھی پڑھیں

ویڈیو کے دلچسپ حصے کا تعین واچ ڈیٹا اور اے آئی ٹیکنالوجی کی مدد سے کیا جائے گا۔

اگر آپ کسی ویڈیو کو پورا دیکھنے کی بجائے صرف اس کا بہترین حصہ دیکھنا پسند کرتے ہیں تو یہ ایک کارآمد فیچر ثابت ہوگا۔

اس سے یہ عندیہ بھی ملتا ہے کہ گوگل کی جانب سے یوٹیوب میں اے آئی ٹیکنالوجی کو ہر شعبے میں شامل کیا جا رہا ہے۔

فیچر کیسے استعمال کریں؟

اگر آپ یوٹیوب پریمیئم سروس استعمال کرتے ہیں تو اینڈرائیڈ فون میں یوٹیوب ایپ میں اس فیچر کو استعمال کر سکتے ہیں۔

اس مقصد کے لیے کسی ویڈیو کو اوپن کرکے اسکرین کے دائیں جانب انگلی سے 2 جانب کلک کریں۔

یعنی جس طرح ویڈیو کو 10 سیکنڈ آگے کیا جاتا ہے، ویسا کرنے سے Jump Ahead بٹن دائیں جانب نیچے اسکرین پر نظر آئے گا۔

اس پر کلک کرنے پر آپ ویڈیو کے بہترین حصے کو دیکھ سکیں گے۔

یوٹیوب کی جانب سے اے آئی ٹیکنالوجی پر مبنی Ask بٹن کی بھی آزمائش کی جا رہی ہے جس کے ذریعے پریمیئم صارفین کسی ویڈیو کے بارے میں مخصوص سوالات پوچھ سکیں گے یا متعلقہ مواد تلاش کر سکیں گے۔