صارفین کی آسانی کیلئے واٹس ایپ میں تبدیلیاں، نیا لے آؤٹ کیسا ہوگا؟

11 مئی ، 2024

واٹس ایپ کا لے آؤٹ اگرچہ نیا ہوگا لیکن ایپ صارفین کے استعمال کیلئے اب بھی آسان ہی رہے گی/فوٹوبشکریہ غیر ملکی میڈیا

مقبول میسیجنگ ایپ واٹس ایپ نے اپنے صارفین کی آسانی کیلئے اپ ڈیٹ ڈیزائن متعارف کرنے کا اعلان کردیا۔

سوشل میڈیا پر کمپنی کی جانب سے جاری بیان اور ویڈیو میں بتایا گیا ہے کہ واٹس ایپ کا لے آؤٹ اگرچہ نیا ہوگا لیکن ایپ صارفین کے استعمال کیلئے اب بھی آسان ہی رہے گی۔

نئی اپ ڈیٹ کے بعد واٹس ایپ میں کیا تبدیلی آئے گی؟

کمپنی کی جانب سے جاری بیان کے مطابق واٹس ایپ کا نیا لے آؤٹ اور آئیکنز صارفین کو تیزی سے مطلوبہ مواد تلاش کرنے میں مدد دیں گے، اینڈرائیڈ صارفین نئے نیوی گیشن بار کے ذریعے اپنے کونٹیکٹ جلد تلاش کرسکیں گے تاہم اینڈرائیڈ یا آئی فون صارفین کیلئے ایپ کا استعمال اب بھی ایک آسان تجربہ ہوگا۔

یہ بھی پڑھیں

صارفین کی واٹس ایپ سے وابستگی بڑھانے کیلئے کمپنی نے اینی میشن کے ساتھ اضافی السٹریشن بھی شامل کردی ہیں۔

میٹا کا کہنا ہے کہ کمپنی واٹس ایپ کے نئے لے آؤٹ کیلئے روایتی سبز رنگ کو الوداع کہتے ہوئے ایک چمکتے ہوئے سبز رنگ کو شامل کررہی ہے، اس نئے شیڈ کے انتخاب سے قبل کمپنی نے 35 سے زیادہ رنگوں پر غورکیا، ڈارک موڈ ترجیح دینے والے صارفین کیلئے کمپنی نے ’گہرا ڈارک موڈ‘ متعارف کرایا ہے۔

نئے لے آؤٹ میں آئی فون صارفین تصاویر اور ویڈیو شیئر کرتے وقت شامل کیے گئے نئے expandable tray کے ذریعے فیچرز کو واضح طور پر دیکھ سکیں گے۔

صارفین اب اپنی گفتگو کو فلٹرز کے ذریعے بہتر طریقے سے منظم کر سکیں گے جس سے نہ پڑھی جانے والی گروپ چیٹس کی نگرانی کرنا آسان ہو جائےگا۔

واٹس ایپ نے نئی تبدیلیوں کے آغاز کیلئے فی الحال کسی تاریخ کا اعلان نہیں کیا ہے تاہم امید ہے کہ یہ تبدیلیاں جلد ہی شروع کر دی جائیں گی۔