کھیل

امریکا سے میچ سے قبل شاہد آفریدی کی اعظم اور شاداب سے فون پر کیا بات ہوئی؟

07 جون ، 2024

امریکا سے میچ سے قبل شاہد آفریدی کی اعظم اور شاداب سے فون پر کیا بات ہوئی؟ — جب بھی کوئی کھلاڑی مشکل وقت سے گزرہا ہو میں اسے بطور سینئر کال کرتا ہوں: سابق کپتان کی گفتگو/ فائل فوٹو

سابق کپتان شاہد آفریدی نے کہا ہےکہ میچ سے قبل اعظم خان کو کال پر کہا تھا کہ اگر پرفارم نہیں کرو گے تو تمہاری فٹنس پر بات آئےگی جب کہ شاداب کو خود کال اور میسجز کرکے ان کی غلطیوں کی نشاندہی کے ساتھ ساتھ ٹپس بھی دیں تھی۔

سابق کپتان کی اعظم خان کو کال

امریکا سے میچ میں شکست کے بعد نجی میڈیا سے گفتگو کے دوران شاہد آفریدی نے بتایا کہ جب بھی کوئی کھلاڑی مشکل وقت سے گزرہا ہو میں اسے بطور سینئر کال کرتا ہوں، کئی عرصے سے دیکھ رہا ہوں اعظم پر سوشل میڈیا پر بہت تنقید ہورہی ہے، میں ابھی انگلینڈ میں ہوں، اعظم خان کو کالز بھی کی، ان کو فون پر میرا یہی میسج تھا کہ آپ پرفارم نہیں کرو گے تو آپ کی فٹنس پر بات آئے گی، یہ بات میں اعظم سے 8،9 سالوں سے کہہ رہا ہوں کہ آپ اپنی فٹنس بہتر کریں۔

شاہد آفریدی کی شاداب خان کو کال

دوسری جانب شاہد آفریدی نے بتایا کہ انگلینڈ سے آخری میچ کے دوران میں نے خود شاداب کو کالز ، میسج اور ویڈیو کالز کرکے ان کی غلطیاں بتائیں، میں نے شاداب سے کہا تھا کہ مجھے آ پ میں پہلے والا شاداب نظر نہیں آرہا، میں نے شاداب سے پریکٹس کی ویڈیوز بھی منگوائی تھیں، ویڈیو دیکھنے کے بعد میں نے شاداب کو ٹپس دی تھیں اس کے بعد شاداب نے مجھے کہا تھا کہ ان کی بولنگ اور بیٹنگ میں بہتری آئی ہے، میں نے شاداب سے کہا تھا کہ آپ نے اب آگے بھی اسی پلان کو لے کر چلنا ہے۔

سابق کپتان نے مزید کہا کہ یہی ہمارے کھلاڑی ہیں اور انہوں نے ہی پرفارم کرنا ہے، ہمیں ابھی ان کھلاڑیوں کی حوصلہ افزائی کرنی ہوگی، پھر چاہے وہ بابراعظم ہوں یا کوئی بھی کھلاڑی ہو ، ہم ورلڈکپ کے بعد ان کھلاڑیوں کی غلطیاں نکالتے رہیں گے۔