پاکستان کیخلاف سپر اوور کروانے والے امریکی بولر کا اصلی پیشہ کیا ہے؟

آئی سی سی ٹی ٹوئنٹی ورلڈکپ میں گزشتہ شب وہ ہوا جس کا شاید کسی نے گمان بھی نہ کیا تھا، پہلی بار ورلڈکپ کھیلنے والی امریکی ٹیم نے مضبوط اور تجربہ کار پاکستان ٹیم کو ناکوں چنے چبوادیے اور سپر اوور میں شکست دے کر بڑا اپ سیٹ کر دیا۔

ڈیلس میں گروپ اے کے کھیلے گئے میچ میں امریکا کے کپتان مونانک پٹیل نے ٹاس جیت کر پاکستان کو پہلے بیٹنگ کی دعوت دی۔

پاکستان نے مقررہ 20 اوورز میں 7 وکٹوں کے نقصان پر 159 رنز بنائے، جواب میں امریکا نے بھی3 وکٹوں کے نقصان پر 159 رنز اسکور کیے۔

امریکا کو میچ جیتنے کے لیے آخری گیند پر 5 رنز درکار تھے،امریکی بیٹر نتیش کمار نے حارث رؤف کو چوکا مار کر میچ برابر کردیا اور پھر میچ کا فیصلہ سپر اوور میں ہوا۔

سپر اوور میں امریکا نے پہلے بیٹنگ کرتے ہوئے 18 رنز اسکور کیے اور گرین شرٹس کو 19 رنز کا ہدف ملا۔

جواب میں امریکی فاسٹ بولر سوربھ نیتراولکر کی شاندار بولنگ کی بدولت پاکستان ہدف کا تعاقب نہ کرسکا اور صرف 13 رنز بنا سکا۔  

پاکستان کیخلاف سپر اوور کروانے والے امریکی بولر کا اصلی پیشہ کیا ہے؟

پاکستان کے خلاف شاندار بولنگ کرکے اپنی ٹیم کو تاریخی فتح دلوانے والے بھارتی نژاد امریکی فاسٹ بولر سوربھ نیتراولکر پیشے کے لحاظ سے سافٹ ویئر انجینیئر ہیں۔

بھارتی میڈیا کے مطابق 32 سالہ نیتراولکر گزشتہ 8  سالوں سے امریکا میں ٹیک کمپنی اوریکل میں سافٹ ویئر انجینیئر کے طور پر کام کر رہے ہیں۔ 

ٹی ٹوئنٹی ورلڈکپ میں بڑا اپ سیٹ: امریکا نے پاکستان کو سپر اوور میں شکست دیدی

امریکا نے سپر اوور میں پاکستان کو جیت کیلئے 19 رنز کا ہدف دیا، قومی ٹیم صرف 13 رنز بناسکی. میزبان امریکا کی ایونٹ میں یہ مسلسل دوسری کامیابی ہے

ان کے LinkedIn پروفائل کے مطابق سوربھ اوریکل کمپنی میں پرنسپل ممبر آف ٹیکنیکل اسٹاف ہیں۔

پاکستان کے خلاف تاریخی فتح حاصل کرنے کے بعد  اوریکل کمپنی نے سوربھ کو شاندار کارکردگی پر مبارک باد بھی دی ہے۔

واضح رہے کہ سوربھ امریکا منتقل ہونے سے قبل بھارتی انڈر 19 کرکٹ ٹیم کی بھی نمائندگی کرچکے ہیں۔ 

کچھ رپورٹس میں یہ دعویٰ بھی کیا گیا ہے کہ زیادہ تر امریکی کرکٹ ٹیم کے کھلاڑی پیشے کے لحاظ سے دوسرے شعبوں سے وابستہ ہیں اور وہ کرکٹ کو پارٹ ٹائم کھیلتے ہیں۔