25 جون ، 2024 
کراچی میں اچانک ہلاکتوں کی وجہ لوڈشیڈنگ نکلی تو کے الیکٹرک پر قتل کے مقدمے ہونگے: وزیرداخلہ سندھ
25 جون ، 2024
سندھ کے وزیر داخلہ ضیا الحسن لنجار نے کہا ہے کہ کراچی میں گزشتہ دنوں میں متعدد افراد کی اچانک ہلاکتوں انکوائری میں بجلی کی لوڈشیڈنگ وجہ بنی تو کے الیکٹرک کے منتظمین اور ذمہ داران پر قتل کے مقدمات درج کیے جائیں گے۔
ضیا الحسن لنجار نے شہر میں گزشتہ دنوں میں متعدد افراد کی اچانک ہلاکتوں پر دکھ اور افسوس کا اظہار کیا۔
انہوں نے کہا کہ ایسے واقعات کی انکوائری کی جارہی ہےکہ آخرکار اموات کی کیا وجوہات ہیں؟ ان کا کہناتھاکہ انکوائری میں بجلی کی لوڈشیڈنگ وجہ بنی تو ذمہ داری کے ای پر عائد کی جائے گی۔
ضیا لنجار کا کہنا تھاکہ کے الیکٹرک کے منتظمین اور ذمہ داران پرقتل کےمقدمات درج کیے جائیں گے۔
خیال رہے کہ کراچی میں اس ہفتے گرمی کا پارہ 40 سے 43 ڈگری سینٹی گریڈ تک گیا جبکہ اس کی شدت 52 سینٹی گریڈ تک محسوس کی گئی۔
ایسے میں پانی اور بجلی وہ نعمتیں تھیں جو شہریوں کو موسم کی ہولناکی سے بچا سکتی تھیں مگر ستم یہ ہوا کہ بیشتر علاقوں میں بجلی 12 سے 14 گھنٹے اور پانی کئی دن سے غائب ہے۔ پہلا نتیجہ یہ نکلا کہ ہیٹ اسٹروک سے درجنوں ہلاکتیں ہوئیں جس کا ریکارڈ میت خانوں میں بھی موجود ہے۔
شہری حلقوں کا کہنا ہے کہ سندھ حکومت، کے الیکٹرک اور واٹر بورڈ سمیت متعلقہ اداروں نے شہر میں بنیادی سہولتوں کی بلا تعطل فراہمی یقینی نہ بنائی تو صورتحال قابو سے باہر ہوجائے گی۔
