کوہلی نہ لارا، اینڈرسن کو کیریئر میں سب سے مشکل بیٹر کون لگا؟

ٹیسٹ کرکٹ میں سب سے زیادہ وکٹیں لینے والے فاسٹ بولر جیمز اینڈرسن ویسٹ انڈیز کے خلاف اپنا آخری میچ کھیل کر ریٹائر ہوگئے۔

اپنی سوئنگ بولنگ سے بیٹرز کو پریشان کرنے والے انگلینڈ کے فاسٹ بولر جیمز اینڈرسن نے ویسٹ انڈیز کے خلاف اپنے کیریئر کے آخری ٹیسٹ میں 4 وکٹیں حاصل کیں۔

انہوں نے اپنے کیریئر میں مجموعی طور پر 188 ٹیسٹ میں 704 وکٹیں حاصل کیں، وہ 700 سے زائد وکٹیں لینے والے تیسرے بولر جبکہ واحد فاسٹ بولربنے۔ 

41 سالہ جیمز اینڈرسن نے تینوں فارمیٹس میں مجموعی طورپر 991 شکار کیے۔اپنے  تقریباً 22 سالہ شاندار کیریئر میں انہوں نے اپنی سوئنگ سے کئی بیٹرز کو مشکل میں ڈالا۔

لیکن کیا کوئی ایسا بیٹر بھی تھا جس نے انگلش فاسٹ بولر کو  پریشان کیا؟

جی ہاں! کیریئر کے آخری ٹیسٹ میچ سے قبل برطانوی میڈیا کو انٹرویو دیتے ہوئے جیمز اینڈرسن نے اپنے طویل کیریئر میں سب سے مشکل ترین بیٹر کے بارے میں بتایا۔

انہوں نے کہا کہ مجھے لیجنڈری سچن ٹنڈولکر کے خلاف بولنگ کرنامشکل لگا، وہ بہترین بیٹر تھے، ان کے خلاف میں نے کوئی خاص منصوبہ نہیں بنایا لیکن مجھے معلوم تھا کہ جب وہ بیٹنگ کرنے آگئے تو میں ان کے خلاف کوئی بری گیند نہیں کرسکتا۔  

انگلش فاسٹ بولر جیمز اینڈرسن ٹیسٹ کرکٹ سے ریٹائر ہوگئے

21 سالہ طویل کریئر میں جمی اینڈرسن نے تینوں فارمیٹس میں مجموعی طورپر 991 وکٹیں حاصل کیں۔

اینڈرسن نے کہا کہ ٹنڈولکر بھارتی ٹیم کے ایک اہم بیٹر تھے، یہی وجہ ہے کہ اگر آپ انہیں بھارت میں آؤٹ کرتے تو گراؤنڈ میں پورا ماحول ہی بدل جاتا ہے، وہ اتنی بڑی وکٹ تھی۔

یاد رہے کہ 20 سال کی عمر میں جیمز اینڈرسن کے ٹیسٹ کیریئر کا آغاز 2003 میں زمبابوے کے خلاف لارڈز کے میدان میں ہوا جہاں انہوں نے پہلی اننگ میں 73 رنز دے کر 5 وکٹیں حاصل کیں۔

انہوں نے 12 جولائی 2024 کو اسی میدان میں ویسٹ انڈیز کے خلاف آخری ٹیسٹ بھی کھیلا، انگلینڈ اور ویسٹ انڈیز کے کھلاڑیوں نے قطار بنا کر جمی کو گارڈ آف آنرپیش کیا، جبکہ شائقین نے کھڑے ہوکر تالیوں کی گونچ میں انہیں الوداع کیا۔

جیمز ایڈرسن نے 194 ون ڈے میچوں میں انگلینڈ کی نمائندگی  بھی کی اور 269 وکٹیں حاصل کیں جبکہ 2007 سے 2009 تک 19 ٹی20 انٹرنیشنلز میں 18 وکٹیں حاصل کیں۔