14 جولائی ، 2024 
انسٹاگرام میں طویل کی بجائے مختصر ویڈیوز پر ہی توجہ مرکوز کرنے کا اعلان
14 جولائی ، 2024
انسٹاگرام کے سربراہ ایڈم موسیری نے کہا ہے کہ فوٹو شیئرنگ پلیٹ فارم میں طویل کی بجائے مختصر ویڈیوز پر توجہ مرکوز کرنے کا سلسلہ برقرار رہے گا۔
انہوں نے یہ اعلان اس وقت کیا جب ٹک ٹاک کی جانب سے مختصر کی بجائے طویل ویڈیوز پر زیادہ توجہ مرکوز کی جا رہی ہے۔
ایک خطاب میں ایڈم موسیری نے بتایا کہ آنے والے برسوں میں انسٹاگرام میں ریلز ویڈیوز کو ترجیح دی جائے گی۔
انہوں نے مزید بتایا کہ انسٹاگرام میں 2 چیزوں پر توجہ مرکوز کی جائے گی، ایک آپ کو دوستوں سے منسلک کرنا اور دوسری مختصر ویڈیوز۔
ان کا کہنا تھا کہ مختصر ویڈیوز انسٹاگرام کی شناخت ہیں اور طویل ویڈیوز سے ہمارا بنیادی مقصد متاثر ہوتا ہے۔
ایڈم موسیری کے مطابق 10 یا 20 منٹ کی ویڈیو دیکھنے پر آپ اپنے دوستوں کا کم مواد دیکھتے ہیں، اپنے دوستوں سے کم رابطہ کرتے ہیں اور آپ اپنے دوستوں کے ساتھ بھی کم مواد شیئر کرتے ہیں۔
انہوں نے کہا کہ ہمارا مقصد لوگوں کو دوستوں سے جوڑنا ہے اور ہم طویل ویڈیوز کے ذریعے اس کو نقصان نہیں پہنچانا چاہتے۔
خیال رہے کہ ٹک ٹاک نے مختصر ویڈیوز کے ذریعے مقبولیت حاصل کی مگر اب وہ طویل ویڈیوز پر توجہ مرکوز کر رہی ہے۔
ٹک ٹاک کی جانب سے بتدریج ویڈیوز کے دورانیے میں اضافہ کیا جا رہا ہے۔
مئی 2024 میں ٹک ٹاک نے تصدیق کی تھی کہ ایپ کے اندر 60 منٹ طویل ویڈیوز پوسٹ کرنے کے فیچر کی آزمائش کی جا رہی ہے۔
یہ فیچر محدود صارفین کو دستیاب ہے۔
کمپنی کے مطابق اس فیچر کی آزمائش کا فیصلہ صارفین کے مطالبے پر کیا گیا جو طویل دورانیے کا مواد پوسٹ کرنا چاہتے ہیں۔
مزید خبریں :
میٹا نے فیس بک میسنجر میں متعددد نئے فیچرز متعارف کرا دیے
24 نومبر ، 2024
بلیو اسکائی کے صارفین کی تعداد 2 کروڑ سے زائد ہوگئی
20 نومبر ، 2024
ایپل کا اب تک کا سب سے پتلا آئی فون
20 نومبر ، 2024
