انسٹا گرام میں اب آپ اپنی شخصیت کا اے آئی ورژن تیار کر سکتے ہیں

میٹا نے انسٹا گرام میں آرٹی فیشل انٹیلی جنس (اے آئی) ٹیکنالوجی پر مبنی ایک نیا فیچر متعارف کرایا ہے۔

اس فیچر سے آپ انسٹا گرام میں اپنی شخصیت کا اے آئی ورژن بہت آسانی سے تیار کرسکیں گے۔

اے آئی اسٹوڈیو نامی یہ فیچر سب سے پہلے امریکا میں متعارف کرایا گیا ہے۔

اے آئی اسٹوڈیو سے صارفین اپنی شخصیت یا کسی بھی قسم کے کردار کا اے آئی ورژن تیار کرسکیں گے۔

میٹا کا نیا اے آئی امیجن می ٹول آپ کی تصاویر تیار کرے گا

یہ ٹول ابھی امریکا میں صارفین کے لیے متعارف کرایا گیا ہے اور فی الحال بیٹا (beta) ورژن میں دستیاب ہے۔

اسے 2 طریقوں سے استعمال کرنا ممکن ہے۔

اس کے لیے آپ ai.meta.com/ai-studio نامی ویب سائٹ پر جا سکتے ہیں یا اپنے فون پر انسٹا گرام ایپ میں اسے استعمال کرسکتے ہیں۔

انسٹا گرام ایپ میں آپ کو میسجنگ میں نئی چیٹ شروع کرکے وہاں موجود Create an AI chat آپشن پر کلک کرنا ہوگا۔

ایسا کرنے کے بعد آپ کو مختلف آپشنز جیسے پرسنلٹی، ٹون، اواتار اور دیگر نظر آئیں گے تاکہ آپ اپنا اے آئی ورژن تیار کرسکیں۔

میٹا کی جانب سے مختلف معروف شخصیات کے اے آئی ورژن بھی تیار کیے گئے ہیں تاکہ صارفین کو معلوم ہوسکے کہ یہ ٹول کس طرح کام کرتا ہے۔

میٹا کی جانب سے یہ نہیں بتایا گیا کہ امریکا کے بعد دیگر ممالک میں یہ فیچر کو کب تک متعارف کرایا جائے گا۔