31 جولائی ، 2024 
حریف ٹیم کی جاسوسی کا معاملہ: فیفا کے فیصلے کیخلاف کینیڈین فٹبال حکام کی اپیل مسترد
31 جولائی ، 2024
کھیلوں کی عالمی ثالث عدالت نے حریف ٹیم کی جاسوسی کے معاملے پر فیفا کے فیصلے کے خلاف کینیڈین فٹبال حکام کی اپیل کو مسترد کر دیا۔
فیفا نے حریف ٹیم نیوزی لینڈ کی تیاریوں کی جاسوسی کیلئے ڈرون استعمال کرنے پر اولمپکس ویمنز فٹبال ایونٹ میں کینیڈا کی ٹیم کے 6 پوائنٹس کاٹے تھے۔
فیفا نے کینیڈین فٹبال ایسوسی ایشن پر 2 لاکھ سوئس فرینک (2 لاکھ 26 ہزار 346 امریکی ڈالرز) کا جرمانہ بھی عائد کیا تھا۔
کینیڈا نے فیفا کے فیصلے کیخلاف سی اے ایس میں اپیل کی تھی۔اپیل میں کینیڈین فٹبال حکام نے پوائنٹس کی کٹوتی منسوخ یا سزا میں نرمی چاہی تھی۔
تاہم کھیلوں کی عالمی ثالث عدالت نے 30 جولائی کو معاملے پر سماعت کی جس میں سی اے ایس ایڈ ہاک پینل نے سماعت کے بعد کینیڈا کی اپیل کو مسترد کردیا۔
سی اے ایس کی جانب سے مختصر اعلامیہ جاری کیا گیا ہے جبکہ حتمی فیصلہ بعد میں جاری ہوگا۔
خیال رہے کہ کینیڈا اور نیوزی لینڈ کے درمیان 25 جولائی کو میچ ہوا تھا جو کینیڈا نے 1-2 سے جیت لیا تھا۔
مزید خبریں :
اظہر علی کو پی سی بی میں اہم عہدہ مل گیا
22 نومبر ، 2024
