02 اگست ، 2024 
ہنیہ کی شہادت: تل ابیب میں ترک سفارتخانے پر جھنڈا سرنگوں کرنے پر اسرائیل سیخ پا
02 اگست ، 2024
مقبوضہ فلسطین کی مزاحمتی تنظیم حماس کے سربراہ اسماعیل ہنیہ کی شہادت کے سوگ میں تل ابیب میں قائم ترک سفارت خانے پرجھنڈا سرنگوں کرنے پر اسرائیلی وزیر برہم ہوگئے۔
اسرائیلی میڈیا کے مطابق حماس رہنما اسماعیل ہنیہ کی شہادت پر ترکیہ میں آج یوم سوگ منایا جارہا ہے اور اس حوالے سے تل ابیب میں قائم ترک سفارت خانے پر ترکیہ کا جھنڈا سرنگوں کیا گیا۔
ترکیہ کے اس عمل پر اسرائیلی وزیر برہم ہوگئے۔ اسرائیلی وزیر بن گویر نے کہا کہ ترک سفیر اپنا جھنڈا مکمل طور پر اتار کر اپنے ملک واپس چلے جائیں، وزیراعظم اور وزیرخارجہ ترک سفیرکو ملک سے بےدخل کریں۔
دوسری جانب اسرائیلی وزارت خارجہ نے پرچم سرنگوں کرنے پر اسرائیل میں ترکیہ کے ڈپٹی سفیر کو طلب کرلیا۔
اسرائیلی وزیر خارجہ کٹز نے اپنے ایک بیان میں کہا کہ اسرائیلی ریاست اسماعیل ہنیہ جیسے کسی بھی قاتل کا سوگ منانے کی اجازت نہیں دیگی۔
خیال رہےکہ حماس کے سربراہ اسماعیل ہنیہ 31 جولائی کو ایرانی دارالحکومت تہران میں ہونے والے اسرائیلی حملے میں شہید ہوئے تھے، وہ ایرانی صدر محمود پزشکیان کی تقریب حلف برداری میں شرکت کے لیے تہران میں موجود تھے۔
اسماعیل ہنیہ کا نماز جنازہ قطر کے دارالحکومت دوحا میں ادا کیا گیا جس میں امیر قطر شیخ تمیم بن حمد سمیت عوام کی بڑی تعداد نے شرکت کی۔
مزید خبریں :
مکہ مکرمہ، طائف اور دیگر سعودی شہروں میں موسلا دھار بارش
25 نومبر ، 2024
ڈونلڈ ٹرمپ نے اپنی 15 رکنی کابینہ کا انتخاب مکمل کرلیا
25 نومبر ، 2024
