ہمیں آسٹریلیا، بھارت اور نیوزی لینڈ کی طرح ہوم گراؤنڈ کو اپنا قلعہ بنانا ہے: شان مسعود

پاکستان ٹیسٹ کرکٹ ٹیم کے کپتان شان مسعود کاکہنا ہے کہ ہمیں آسٹریلیا، بھارت اور نیوزی لینڈ کی طرح ہوم گراونڈ کو اپنا قلعہ بنانا ہے، ہم اپنے ہوم گراونڈز کو دوسروں کے لیے ایک چیلنجنگ جگہ بنانا چاہتے ہیں۔

کپتان شان مسعود اور ریڈ بال ہیڈ کوچ جیسن گلیسپی نے  پی سی بی پوڈ کاسٹ میں اظہار خیال کیا۔

پی سی بی پوڈ کاسٹ میں گفتگو کرتے ہوئے کپتان شان مسعود نے کہا کہ اگلے چار سے پانچ ماہ کے دوران 9 ٹیسٹ میچز کھیلنے کے لیے پرجوش ہیں ، اس سے قبل یہ ایک سال کے دوران کبھی نہیں ہوا۔

شان مسعود نے کہا کہ 2019 سے اب تک ہمیں ہوم گراؤنڈز پر کھیلنے کا اپنا انداز نہیں ملا، دیگر ٹیمیں اپنے ہوم گراؤنڈز پر لمبے عرصے سے کھیل رہی ہیں ، ہمیں آسٹریلیا، بھارت اور نیوزی لینڈ کی طرح ہوم گراؤنڈ کو اپنا قلعہ بنانا ہے۔

ان کاکہنا تھا کہ ہم اپنے ہوم گراؤنڈز کو دوسروں کے لیے ایک چیلنجنگ جگہ بنانا چاہتے ہیں۔

شان مسعود نے کہا کہ میں انگلینڈ کی صرف باز بال اپروچ کو ہی نہیں سراہتا لیکن ان کی ٹیلنٹ کی شناخت کر کے اسے موقع دینے کی اپروچ کو بھی سراہتا ہوں، عظیم ٹیموں کا ڈریسنگ روم کلچر بھی ان کی کامیابی کا باعث بنتا ہے۔ 

ان کا کہنا تھا کہ دلچسپ بات یہ ہے کہ ہمارے موجودہ اسکواڈ میں 6 ایسے فاسٹ بولرز ہیں جو پلئینگ الیون میں شامل ہونے کا دعویٰ کر سکتے ہیں۔

شان نے پیرس اولمپکس میں گولڈ میڈل جیتنے والے ارشد ندیم کے حوالے سے کہا کہ انہوں نے ہم سب کو جذباتی کردیا ، پوڈیم پر پرچم لہرانا اور اولمپک بیل بجانا بڑا شاندار تھا، ان کی کامیابی نے پاکستان کے لیے کچھ کرنے کے لیے سب کو متحرک کیا۔

بنگلادیش کی کرکٹ ٹیم ٹیسٹ سیریز کھیلنے کیلئے لاہور پہنچ گئی

سیریز کا پہلا میچ 21 اگست سے راولپنڈی جبکہ دوسرا ٹیسٹ 30 اگست سے کراچی میں شروع ہوگا

اس کے علاوہ پاکستان ٹیسٹ ٹیم کے ہیڈ کوچ جیسن گلیسپی کاکہنا تھا کہ بیرون ملک کھیلنے کا کھلاڑیوں کو مالی طور پر فائدہ ہوتا ہے، اگر کھلاڑیوں کو بیرون ملک کھیل کر پاکستان کے لیے ایک بہتر کرکٹر بننے کا موقع ملتا ہے تو انہیں ان مواقع کو زیر غور لانا چاہیے۔

واضح رہے کہ پاکستان اور بنگلادیش کے درمیان سیریز کا پہلا میچ 21 اگست سے راولپنڈی جبکہ دوسرا ٹیسٹ 30 اگست سے کراچی میں شروع ہوگا۔