ویڈیو: ارشد کی تھرو کے وقت کیا جذبات تھے؟ اہلیہ کے جواب سے وزیراعظم ہاؤس تالیوں سے گونج اٹھا

پیرس اولمپکس میں پاکستان کے لیے 40 برس بعد گولڈ میڈل جیت کر سبز ہلالی پرچم کو دنیا بھر میں سر بلند کرنے والے قومی ہیرو ارشد ندیم کی اہلیہ نے اپنے شوہر کی جیولن تھرو کے جذبات کے حوالے سے لب کشائی کی ہے۔ 

گزشتہ روز قومی ہیرو ارشد ندیم کے اعزاز میں وزیراعظم شہباز شریف کی جانب سے  وزیراعظم ہاؤس اسلام آباد میں پروقار تقریب کا اہتمام کیا گیا جس میں وفاقی وزراء اور ارشد ندیم کے اہلخانہ بھی شریک تھے۔

 تقریب کی خاتون میزبان کی جانب سے ارشد ندیم کی اہلیہ سے پوچھا گیا کہ آپ کتنا پرامید تھیں کہ ارشد گولڈ میڈل جیت لیں گے؟ جس کا مختصر سا جواب دیتے ہوئے ارشد ندیم کی اہلیہ کا کہنا تھا ’بہت زیادہ‘۔

پروگرام کے دوسرے میزبان کی جانب سے ارشد ندیم کی اہلیہ سے پوچھا گیا کہ جب اتنے بڑے ایونٹ میں ارشد ندیم تھرو پھینک رہے تھے تو کیا آپ کو بھی ٹینشن تھی؟ قومی ہیرو کی اہلیہ کا کہنا تھا ٹینشن تو ہو رہی تھی لیکن دعا بھی کر رہی تھی کہ اللہ پاک ارشد کو کامیاب کریں اور وہ گولڈ میڈل لیکر آئیں پاکستان کے لیے، پوری پاکستانی قوم کی بھی دعائیں ان کے ساتھ تھیں، ان کے والدین کی بھی اور ہماری بھی دعائیں ان کے ساتھ تھیں۔    

ایک سوال کے جواب میں ارشد ندیم کی اہلیہ کا کہنا تھا جب کبھی ارشد ندیم ہمت ہارتے تھے تو ہم ان کی ہمت باندھتے تھے اور ان سے کہتے تھے کہ آپ نے ہمت نہیں ہارنی، آپ کے پیچھے پوری قوم کے ماں باپ کی دعائیں ہیں، تو پھر ان کا حوصلہ بڑھ جاتا تھا۔