صحت و سائنس

پشاور ائیرپورٹ پر منکی پاکس کے مزید 5 مشتبہ کیس رپورٹ

31 اگست ، 2024

پشاور ائیرپورٹ پر منکی پاکس کے مزید 5 مشتبہ کیس رپورٹ — پشاور ائیرپورٹ پر ابھی تک 23 ہزار 658 مسافروں کی اسکریننگ ہوچکی ہے،محکمہ صحت خیبر پختونخوا،فوٹو: فائل

پشاور ائیرپورٹ پر دوران اسکریننگ منکی پاکس کے مزید 5 مشتبہ کیس رپورٹ ہوئے ہیں۔

محکمہ صحت خیبر پختونخوا کے مطابق پانچوں افراد کو پولیس سروسز اسپتال میں قرنطینہ کردیا گیا۔

محکمہ صحت کے مطابق تمام مشتبہ افراد کے نمونے ٹیسٹ کے لیے بھجوائے ہیں، پشاور ائیرپورٹ پر ابھی تک 23 ہزار 658 مسافروں کی اسکریننگ ہوچکی ہے، طورخم بارڈر پر 22 ہزار 67 افراد کی اسکریننگ کی گئی ہے، درہ زندہ کے سرحدی علاقے پر 123 افراد کی اسکریننگ کی گئی ہے۔

یہ بھی پڑھیں

خیال رہےکہ اس سے قبل پشاور ائیرپورٹ پر منکی پاکس کے 2 مشتبہ کیسز سامنے آئے تھے جن میں سے ایک کیس کا نتیجہ مثبت آیا ہے۔

ترجمان وزارت صحت کے مطابق گزشتہ روز پشاور کے باچا خان ائیرپورٹ پر اسکریننگ کے دوران دونوں مسافروں میں منکی پاکس کی علامات پائی گئیں جس کے بعد دونوں افراد کو بارڈر ہیلتھ سروسز عملے نے آئسولیٹ کیا تھا۔

ترجمان نے بتایا کہ دونوں افراد کے نمونے پشاور ریفرنس پبلک لیبارٹری خیبر میڈیکل یونیورسٹی بھیجےگئے تھے ان میں سے ایک کیس پازیٹو آگیا ہے۔

ترجمان وزارت صحت کے مطابق منکی پاکس ٹیسٹ پازیٹو آنے والا شہری پشاور کا رہائشی ہے، متاثرہ شخص کے سفر کی ہسٹری خلیجی ممالک کی ہے جب کہ متاثرہ شخص کے کانٹیکٹ ٹریسنگ کی اسکریننگ کی جا رہی ہے۔

ترجمان کا کہنا ہےکہ حالیہ ایمرجنسی کے بعد خیبر پختونخوا میں ایم پاکس کیسز کی تعداد 3 ہوگئی ہے۔

اس حوالے سے کوآرڈینیٹر صحت ڈاکٹرمختار کا کہنا ہےکہ حکومت پاکستان نے عوام کو منکی پاکس سے محفوظ رکھنے کے لیے مؤثر حکمت عملی بنارکھی ہے، تمام ائیرپورٹس پربارڈر ہیلتھ سروسز کا اسٹاف کام کر رہا ہے۔