کراچی میں آج ہلکی سے درمیانی شدت کی بارش کا امکان

محکمہ موسمیات نے آج  کراچی سمیت سندھ کے مختلف حصوں میں بارش کی پیشگوئی کی ہے۔

محکمہ موسمیات کے مطابق آج کراچی، حیدرآباد، نواب شاہ، سکھر، میرپورخاص اور تھرپارکر سمیت سندھ کے مختلف حصوں میں بارش کا امکان ہے۔

چیف میٹرولوجسٹ سردار سرفراز کا کہنا ہے کہ  کراچی میں آج  صرف  ہلکی سے درمیانی شدت کی بارش کا امکان ہے جب کہ مضافاتی علاقوں میں تیز بارش ہو سکتی ہے۔

کراچی میں بارشوں کے بعد ائیرپورٹ اتھارٹی کے ملازمین ڈینگی سے متاثر ہونے لگے

ائیرپورٹ اتھارٹی کے شعبہ کارگو میں ڈینگی مچھروں کی بہتات ہے، حالیہ بارشوں کے بعد مچھروں کی تعداد بڑھنے سے ائیرپورٹ میں اسپرے نہیں کیا گیا، ذرائع

سردار سرفراز  کے مطابق  آئندہ دنوں میں کراچی کا موسم گرم رہنے کا امکان ہے، ستمبر میں درجہ حرارت میں ایک ڈگری اضافہ ہوتا ہے جب کہ ستمبر کا اوسط درجہ حرارت 33.5 ڈگری سینٹی گریڈ ہوتا ہے۔

دوسری جانب  اسلام آباد، لاہور، سیالکوٹ، ملتان، موسیٰ خیل، سبی، نصیر آباد، ایبٹ آباد، مانسہرہ ،کوہستان، سوات سمیت چاروں صوبوں میں اور کشمیر وگلگت بلتستان میں بھی کہیں کہیں بارش کا امکان ہے۔

بارشوں سے بلوچستان میں تباہی

ادھر بلوچستان میں 2  ماہ میں ہونے والی بارشوں کے دوران نقصانات کی تفصیل جاری کردی گئی ہیں۔

صوبائی ڈیزاسٹر مینجمنٹ اتھارٹی( پی ڈی ایم اے) کے مطابق مختلف واقعات میں 39 افراد جاں بحق ہوئے، اس دوران 900 سے زائد مکان مکمل تباہ جب کہ 7 پل اور 47 کلومیٹر سڑکوں کو نقصان پہنچا ہے۔