06 ستمبر ، 2024 
حسینہ واجدکوبھارت سے واپس لانا ہوگا ورنہ بنگلادیشی عوام سکون میں نہیں آئینگے، ڈاکٹر یونس
06 ستمبر ، 2024
بنگلادیش کی عبوری حکومت کے مشیر اعلیٰ ڈاکٹر محمد یونس کا کہنا ہے کہ حسینہ واجد کو واپس لانا ہوگا ورنہ بنگلادیش کے لوگ سکون میں نہیں آئیں گے۔
بھارتی میڈیا کو انٹرویو دیتے ہوئے محمد یونس کا کہنا تھا کہ بنگلادیش کی حوالگی درخواست تک حسینہ واجد کو بھارت میں خاموش بیٹھنا چاہیے۔
انہوں نے کہا کہ حوالگی کے مطالبے تک بھارت حسینہ واجد کو رکھنا چاہتا ہے تو حسینہ واجد کا خاموش رہنا شرط ہے۔
محمد یونس کا کہنا تھا کہ حسینہ واجد کے بھارت میں بیٹھ کر بیان بازی کرنے سے کوئی خوش نہیں، ان کے بھارت سے بنگلادیش پر کیے جانے والے تبصرے غیر دوستانہ ہیں۔
بنگلادیش کے مشیر اعلیٰ نے کہا کہ حسینہ واجد عوامی انقلاب اور ناراضی کے باعث فرار ہوئیں، حسینہ واجد کو بھارت میں پناہ دی گئی ہے اور وہ وہاں سے مہم چلا رہی ہیں۔
محمد یونس نے کہا کہ حسینہ واجد کو واپس لانا ہوگا ورنہ بنگلادیش کے لوگ سکون میں نہیں آئیں گے، حسینہ واجد نے جو مظالم کیے ہیں اس کا بنگلادیش میں سب کے سامنے احتساب ہونا چاہیے۔
خیال رہے کہ بنگلادیش کی سابق وزیراعظم حسینہ واجد طلبا احتجاج پر 5 اگست کو بھارت فرار ہوگئی تھیں۔
