پارلیمان کا تقدس پامال کیا گیا، ملک میں آئین کی بالادستی ختم ہو چکی: سلمان اکرم راجا

اسلام آباد پولیس نے پاکستان تحریک انصاف (پی ٹی آئی) کے رہنما سلمان اکرم راجا کو خیبرپختونخوا ہاؤس جانے سے روک دیا۔

اسلام آباد پولیس کی جانب سےروکے جانے کے بعد سلمان اکرم راجا خیبرپختونخواہاؤس کے گیٹ سے واپس روانہ ہوگئے۔

واپس روانگی سے قبل گفتگو کرتے ہوئےسلمان اکرم راجا نے کہا ہے کہ جس طرح گرفتاریاں کی گئیں، اس سے پارلیمان کے تقدس کو پامال کیا گیا۔

خیبرپختونخوا ہاؤس کے باہر گفتگو کےدوران انہوں نے کہاکہ  ملک میں آئین کی بالادستی ختم ہو چکی ہے۔

خیبرپختونخوا ہاؤس کے باہر گفتگو کرتے ہوئے تحریک انصاف کے رہنما کا کہنا تھا کہ لاہور کا جلسہ ہر صورت ہوگا۔

یاد رہے کہ گزشتہ روز اسلام آباد پولیس نے کارروائیاں کرتے ہوئے پی ٹی آئی کے چیئرمین بیرسٹر گوہر اور شیر افضل مروت کو پارلیمنٹ کے باہر سے گرفتار کرلیا تھا جبکہ پولیس ذرائع کے مطابق شعیب شاہین کو ان کے گھر سے گرفتار کیا۔

اسلام آباد پولیس نے پی ٹی آئی چیئرمین بیرسٹر گوہر، شیر افضل اور شعیب شاہین کو گرفتار کرلیا

عمرایوب اور زرتاج گل کو بھی گرفتار کیا جائے گا، پولیس حکام، جلسے میں موجود پنجاب کی قیادت کےخلاف بھی کریک ڈاون شروع ہونےکا امکان ہے: ذرائع

بعد ازاں رات دیر گئے پارلیمنٹ ہاؤس سے سنی اتحاد کونسل کے سربراہ صاحبزادہ حامد رضا، پی ٹی آئی رہنما زین قریشی، شیخ وقاص اکرم اور نسیم الرحمان سمیت دیگر رہنماؤں کو بھی حراست میں لے لیا گیا تھا، تمام رہنما گزشتہ روز  چیئرمین پی ٹی آئی کی گرفتاری کے بعد سے پارلیمنٹ ہاؤس میں موجود تھے۔

پولیس ذرائع کا کہنا تھا کہ نئے قانون کے مطابق جلسے میں موجود پنجاب کی قیادت کےخلاف بھی کریک ڈاؤن شروع ہونے کا امکان ہے اور اسلام آباد پولیس نے پنجاب پولیس کو باضابطہ طور پر آگاہ کر دیا ہے۔

ذرائع نے بتایا کہ پی ٹی آئی رہنماؤں کے خلاف مقدمات 3 تھانوں میں درج کیے گئے ہیں، مقدمات اسمبلی اینڈ پبلک آرڈر2024کے تحت درج کیے گئے، مقدمات میں کار سرکار میں مداخلت، توڑ پھوڑ اور دفعہ 144کی خلاف ورزی کی دفعات شامل ہیں۔