شائقین کرکٹ کا انتظار ختم، چیمپئنز ون ڈے کپ کل سے شروع ہوگا

شائقین کا انتظار ختم ہوا، چیمپئنز ون ڈے کپ کل شروع ہونے جا رہا ہے۔

بدھ کو فیصل آباد کے اقبال اسٹیڈیم میں پہلے چیمپئنز ون ڈے کپ کی ٹرافی کی رونمائی کی گئی جس میں پانچوں ٹیموں کے کپتانوں اور مینٹورز نے شرکت کی اور ٹرافی کے ساتھ فوٹو شوٹ کروایا۔

اپنی نوعیت کے پہلے ون ڈے کپ میں پاکستان کے صف اوّل کے کھلاڑی بابراعظم ، شاہین آفریدی، محمدرضوان، فخرزمان، نسیم شاہ سمیت تمام انٹرنیشنل کھلاڑی اور ڈومیسٹک پلیئرز شامل ہوں گے۔

’ ون ڈے کپ خوش آئند ہے‘، محمد رضوان اور شاداب ایونٹ میں بہتر کارکردگی کیلئے پرعزم

عام طور پر ہمیں ڈومیسٹک مقابلوں اور ٹیموں میں بین الاقوامی اور نوجوان کھلاڑیوں کا ایسا متحرک امتزاج نظر نہیں آتا: محمد رضوان کی گفتگو

ٹورنامنٹ کی فاتح ٹیم کو 3 کروڑ روپے اور رنر اپ ٹیم کو ڈیڑھ کروڑ روپےکی انعامی رقم ملے گی۔

پاکستان وائٹ بال کرکٹ ٹیم کے ہیڈ کوچ گیری کرسٹن بھی ٹورنامنٹ کے دوران موجود ہوں گے۔

ایونٹ کا افتتاحی میچ کل محمد رضوان کی مارخورز اور شاداب خان کی پینتھرز کے درمیان کھیلا جائے گا۔