کاروبار

یہ آئی ایم ایف کا آخری پروگرام بنانا ہے تو ڈھانچہ جاتی اصلاحات کرنا ہوں گی: وزیر خزانہ

26 ستمبر ، 2024

وفاقی وزیرخزانہ محمد اورنگزیب نے کہا ہے کہ عالمی مالیاتی فنڈ (آئی ایم ایف) ایگزیکٹو بورڈ سے قرض پروگرام کی منظوری موجودہ حکومت کی پالیسیوں کی توثیق ہے، پروگرام قبول کرنے اور اعتماد کا اظہار کرنے پر آئی ایم ایف کے شکر گزار ہیں۔

وزیر خزانہ کا کہنا تھا کہ پاکستان کیلئے آئی ایم ایف کا پروگرام اگلے تین سال کا ہے، آئی ایم ایف پروگرام کا مقصد میکرو اکنامک استحکام حاصل کرنا ہے۔ میکرو اکنامک استحکام آئے گا تو اس بنیاد پر ہی عمارت کھڑی ہوگی۔

جیو نیوز سے خصوصی بات چیت کرتے ہوئےانہوں نے کہا کہ بین الاقوامی اداروں نے ہم پر اعتماد کا اظہار کیا ہے اور ریٹنگ ایجنسیوں نے پاکستان کی ریٹنگ بڑھائی ہے۔

یہ بھی پڑھیں

انہوں نے مزید کہا کہ مہنگائی میں کمی اور شرح سود بھی نیچے آ رہی ہے، کرنسی مستحکم اور زرمبادلہ کے ذخائر بڑھ گئے ہیں، مہنگائی میں کمی کا عام آدمی پر اثر آنا شروع ہوگیا ہے، غذا اور کموڈیٹی پرائس میں کمی آئی ہے۔

محمد اورنگزیب کا کہنا تھاکہ آئی ایم ایف کے اس پروگرام کو آخری پروگرام بنانا ہے تو ڈھانچہ جاتی اصلاحات کرنا ہوں گی، ہمیں ماضی کو بھول کر مثبت انداز میں آگے بڑھنا چاہیے، جو ہوگیا وہ ہوگیا، ہمیں یہ سوچنے کی ضرورت ہے کہ اسے آگے کیسے لے کر جانا ہے۔

وزیر خزانہ نے کہا کہ ہم ڈھانچہ جاتی اصلاحات کیلئے پُرعزم ہیں، ٹیکس ہو یا توانائی، پرائیویٹائزیشن ہو یا سرکاری کمپنیاں ہوں، ہم اس پر عمل کیلئے پُرعزم ہیں۔