27 ستمبر ، 2024 
شادی سے قبل ثنا خان کو مولانا طارق جمیل نے وائس نوٹ میں کیا کہا تھا؟
27 ستمبر ، 2024
اسلام کی خاطر بالی وڈ کی چکاچوند چھوڑ کر حجاب اپنانے والی سابقہ اداکارہ ثنا خان نے انکشاف کیا ہے کہ مفتی انس کا رشتہ ان تک مولانا طارق جمیل کی وائس نوٹ میں پہنچا تھا جسے سن کر وہ حیران رہ گئی تھیں۔
ثنا خان حال ہی میں روبینہ دلیک کے پوڈ کاسٹ میں شریک ہوئی تھیں جس دوران انھوں نے اپنی ذاتی زندگی سمیت مفتی انس سے شادی اور ازدواجی تعلق پر بھی بات کی تھی۔
ایک سوال کے جواب میں ثنا خان نے بتایا کہ شادی سے قبل مجھے اپنے شوہر سے ہی یعنی مفتی انس کے ذریعے مولانا طارق جمیل کی وائس نوٹ موصول ہوئی تھی جس میں انھوں نے کہا تھا کہ آپ شادی کے بارے میں سوچیے اور اگر آپ اجازت دیں تو ہم بھی آپ کیلئے رشتہ تلاش کر سکتے ہیں یا پھر آپ مفتی انس سے بھی شادی پر غور کرسکتی ہیں۔
ثنا خان کے مطابق مفتی انس نے شادی کیلئے انہیں براہ راست خود اس لیے نہیں کہا تھا کہ میں انہیں غلط نہ سمجھ بیٹھوں لیکن جب مولانا طارق جمیل کا پیغام سنا تو مفتی انس سے کہا آپ پاگل ہوگئے ہیں آپ کہاں ہیں میں کہاں۔
ثنا خان کا کہنا تھا کہ مفتی انس مجھ سے 7سال چھوٹے ہیں اس لیے میں نے انہیں بتایا کہ تم مجھ سے چھوٹےہو تو ان کا کہنا تھا کہ یہ سنت رسول ﷺ ہے، ہمارے پیارے نبی پاک ﷺ نے بھی حضرت خدیجہ سے شادی کی تھی جو ان سے 15 سال بڑی تھیں۔
یاد رہے کہ ثنا خان نے 2020 میں بالی وڈ کو خیرباد کہہ دیا تھا اور 2021 میں مفتی انس سید سے شادی کی تھی، شادی کے بعد ثنا خان خوشگوار زندگی گزار رہی ہیں،گزشتہ سال ثنا خان اور مفتی انس کے ہاں بیٹے کی ولادت ہوئی تھی جس کا نام بھی دونوں نے طارق جمیل ہی رکھا ہے۔
