انگلش کپتان بین اسٹوکس کی پاکستان کیخلاف پہلے ٹیسٹ میں شرکت مشکوک

انگلینڈ کرکٹ ٹیم کے کپتان بین اسٹوکس کی پاکستان کے خلاف پہلے ٹیسٹ میچ میں شرکت کا فیصلہ نہ ہوسکا۔

میڈیا رپورٹس کے مطابق پاکستان کے خلاف 7 اکتوبر سے ملتان میں شروع ہونے والے ٹیسٹ میں انگلش کپتان بین اسٹوکس کی شرکت مشکوک ہے۔

میڈیا رپورٹ میں بتایا گیا ہے کہ انگلینڈ کو پہلے ٹیسٹ کے لیے بین اسٹوکس کی دستیابی کے لیے مزید انتظارکرنا ہوگا، ان کی غیر موجودگی میں اولی پاپ ٹیم کی قیادت کریں گے۔

 روایت کے مطابق انگلینڈ ٹیم پلئینگ الیون کا اعلان ٹیسٹ میچ سے دو روز قبل کرتی ہے، انگلینڈ ٹیم کا ہفتے کو پاکستان کے خلاف پلئینگ الیون کے اعلان کا امکان ہے۔

انگلینڈ کی پاکستان کو آسانی سے ہرانے کی بات کرنا حماقت ہے: سابق انگلش کپتان ناصر حسین

پاکستان بہترین کرکٹ نیشن ہے وہاں کرکٹ کا جنون ہے اور فینز بھی ٹیم کو ہمیشہ اوپر دیکھنا چاہتے ہیں: ناصر حسین

واضح رہے کہ بین اسٹوکس دی ہنڈرڈ لیگ کے دوران ہیمسٹرنگ انجری کا شکار ہوئے تھےجس کی وجہ سے وہ سری لنکا کےخلاف ٹیسٹ سیریز نہیں کھیل سکے تھے۔

انگلش ٹیم کے بیٹر زیک کرالی کا کہنا ہے کہ ابھی بین اسٹوکس کے کھیلنے کےحوالے سے ہم نہیں جانتے ، وہ بظاہر ٹھیک لگ رہے ہیں اور انجری سے ریکور کر رہے ہیں، میرے خیال میں ان کے مزید ٹیسٹ ہونا باقی ہیں۔

یاد رہے کہ انگلش کرکٹ ٹیم 3 ٹیسٹ میچز کی سیریز کیلئے پاکستان پہنچ گئی ہے۔